पोखरा । पोखराको नर्सिङ क्याम्पसमा स्वतन्त्र विद्यार्थी युनियन निर्वाचनमा एमालेनिकट अखिल नेपाल स्वतन्त्र विद्यार्थी युनियन (अनेरास्ववियु) को प्यानल नै विजयी भएको छ ।

स्ववियु निर्वाचनमा अध्यक्षका उम्मेदवार प्रतिभा भण्डारीले नेपाल विद्यार्थी संघका अध्यक्षका उम्मेदवार रचना पौडेललाई १ सय ४३ मतले पराजित गदै निर्वाचित हुनुभएको हो । भण्डारीले २ सय ४५ मत ल्याउँदा रचनाले १ सय २ मत प्राप्त गर्नुभयो ।

३ सय ४९ मतदाता रहेकोमा ३ सय ४७ मत खसेको थियो । अध्यक्षमा निर्वाचित भण्डारी बिएस्सी दोस्रो वर्षमा अध्ययनरत हुनुहुन्छ । सचिवमा सलिना श्रेष्ठ, कोषाध्यक्षमा कुसुम गौतम निर्वाचित हुनुभयो । प्रत्यक्षतर्फ सदस्यमा दीपा आचार्य, हिमानी थारु, कोमल रावत क्षेत्री, अजिता घर्ती मगर, सचिना सोमाई मगर निर्वाचित भएका छन् ।

समानुपातिकतर्फ अनेरास्ववियुले २ सय ७० मत र नेविसंघले ७५ मत प्राप्त गरेको छ । अनेरास्ववियुबाट समानुपातिकमा १० जना उम्मेदवार छन् ।चुनाव जितेपछि क्याम्पसमा अनेरास्ववियुले राति विजय उत्सव मनाएको थियो ।