वासिङ्टन डीसी । अमेरिकामा यतिबेला चुनावको चहलपहल बाक्लो छ । अमेरिकी खर्बपति व्यापारी एलन मस्कले खुलेर पूर्वराष्ट्रपति तथा रिपब्लिकन उम्मेदवार डोनाल्ड ट्रम्पको पक्षमा लागेका छन् । यसैबिच उनले राष्ट्रपतिको निर्वाचनसम्म हरेक दिन एक जना मतदाताले १० लाख डलर जित्ने मौका दिने वाचा गरेका छन् ।

यसका लागि उनले सर्त पनि तोकेका छन् । अमेरिकी संविधानलाई समर्थन गर्ने आफ्नो याचिकाका लागि चलिरहेको हस्ताक्षर अभियानमा सहभागी हुने कुनै एक अमेरिकी मतदाताले १० लाख डलर पुरस्कार पाउने बताएका छन् । यो अभियान चुनावको दिन अर्थात् नोभेम्बर पाँचसम्म रहनेछ । त्यो दिनसम्म हरेक दिन एक जना मतदातालाई १० लाख डलर दिइने बताइएको छ ।

चाखलाग्दो कुरा के छ भने शनिवार यो घोषणासँगै मस्कले आफ्नो याचिकाको समर्थनमा हस्ताक्षर गर्ने एक मतदातालाई १० लाख डलरको चेक पनि हस्तान्तरण गरेका थिए । ती व्यक्ति ट्रम्पको समर्थनमा पेन्सिलभेनियामा मस्कले आयोजना गरेको र्‍यालीमा सहभागी भएका थिए । मस्कको याचिकालाई समर्थन गरेपछि पहिलो दिन जोन ड्रेहर नामक व्यक्तिलाई मिलियन डलर पुरस्कार घोषणा गरिएको थियो ।

यो चुनावमा मस्क डेमोक्रेटिक उम्मेदवार कमला ह्यारिसलाई हराउन मरिहत्ते गरेर लागिरहेका छन् । ट्रम्पलाई जिताउन उनले अमेरिका पीएसी नामक संस्था खोलेका थिए । यो संस्थाले डेमोक्रेट र रिपब्लिकन पार्टीबिच टक्कर रहेका राज्यहरूमा दर्ता भएका मतदाताहरूलाई आफूसँगै ल्याउने प्रयास गरिरहेको छ । तर, यो काम त्यति सहज भने छैन ।

ट्रम्पको चुनावी अभियानलाई सात करोड डलरभन्दा बढीको दान

एलन मस्क रिपब्लिकन पार्टीको राष्ट्रपतिका उम्मेदवार डोनाल्ड ट्रम्पको कट्टर समर्थकको रूपमा देखा परेका छन् । ट्रम्पलाई दोहोर्‍याएर व्हाइट हाउसमा फर्काउन मस्कले ट्रम्पको चुनाव प्रचार प्रसार समितिलाई ७ करोड ५० लाख डलर दान दिइसकेका छन् । योसँगै यस पटकको चुनावमा मस्क सबैभन्दा ठुला दातामध्ये एक बनेका छन् । एजेन्सी