पोखरा । पोखरा १९ को चुरुङ्गामा शनिबार दोस्रो संस्करणको दाँई महोत्सव २०८२ हुने भएको छ । पोखरा पर्यटन परिषद्को आयोजनामा हुने उक्त महोत्सवमा आन्तरिक तथा बाह्य पर्यटक एवं दर्शक तथा ददेराहरु गरी करिब एक हजार जनाको महोत्सवमा सहभागि हुने बताइएको छ ।

“पोखरा सबै मौसमका लागि आकर्षक गन्तव्य” भन्ने मूल नारासहित महोत्सवमा विभिन्न नगद सहितको पुरस्कारको व्यबस्था गरिएको महोत्सव संयोजक हरिबहादुर भुजेलले बताउनु भयो । कृषिप्रधान देश नेपाली समाजको परम्परागत कृषि प्रणालीको प्रवद्र्धन तथा नयाँ पुस्तालाई खेतीपातीको मौलिक ज्ञान हस्तान्तरण गर्ने उद्देश्य सहित उक्त महोत्सव यसपाली पर्यटकीय र कृषि उत्पादनका दृष्टिले महत्वपूर्ण रहेको चुरुङ्गामा उक्त महोत्सवको तयारी गरिएको परिषदका अध्यक्ष तारानाथ पहारीले बताउनु भयो ।

पोखरामा तीव्र शहरीकरणका कारण खेतीयोग्य जमिन मासिँदै गएको र कृषिप्रति युवापुस्ताको आकर्षण कमजोर बन्दै गएको पृष्ठभूमिमा दाँई महोत्सवले कृषकको परम्परागत परिश्रम, धान उत्पादनको सांस्कृतिक महत्व र कृषि पर्यटनको सम्भावनालाई पुनःस्मरण गराउने उहाँले विश्वास व्यक्त गर्नुभयो । महोत्सवले आन्तरिक तथा बाह्य पर्यटकलाई नेपालको मौलिक कृषि पहिचान नजिकबाट अवलोकन गराउने लक्ष्य लिएको आयोजकले जनाएको छ । दाँई महोत्सवले कृषकलाई सम्मान, कृषि पेशाप्रति उत्प्रेरणा र परम्परागत प्रविधिको प्रदर्शन मार्फत कृषि पर्यटनको अवधारणालाई व्यवहारमै उतार्ने भएको महोत्सव संयोजक हरी भुजेलले बताउनु भयो ।नेपाल पर्यटन बोर्ड गण्डकीका बरिष्ठ निर्देशक तथा प्रमुख मणि राज लामिछानेले पोखरा र पोखरा आसपास क्षेत्रमा हुने यस्ता मेला महोत्सवले पर्यटन प्रर्बद्धन हुने विश्वास व्यक्त गर्दै पोखरामा मात्र केन्द्रित नभई पोखरा आसपास क्षेत्रको पर्यटन प्रबद्र्धन गर्न आफुहरु लागेको जनाउनु भयो ।

“धान मुख्य खाद्यबाली भएकाले त्यसको उत्पादनदेखि भित्र्याउने प्रक्रिया आफैँमा नेपाली पहिचान भएको उहाँको भनाई थियो । महोत्सवमा विभिन्न प्रतियोगिता तथा गतिविधि हुने भएको छ । उत्कृष्ठ गोरू पालक प्रतियोगिता हुने भएको छ । धेरै धान उत्पादन गर्ने कृषक सम्मान, धान चुट्ने दँदेरा प्रतियोगिता, परालको भारी बोक्ने प्रतियोगिता, गुन्द्री बुन्ने प्रतियोगिता, सहभागी दँदेरीलाई परम्परागत टोपी वितरण, अतिथिलाई स्थानीय उत्पादनको उपहार लगायतका आकषर्णहरु रहेकाछन् । विभिन्न प्रतियोगिता अन्र्तगत उत्कृष्ट गोरु पालन किसानलाई ५ हजार, पोखराका ३३ वटा वडा भित्रका किसानहरु मध्य धेरै धान उत्पादन गर्ने किसानलाई १० हजार, दोश्रो हुनेलाई ७ हजार र तेश्रो हुनेलाई ५ हजार प्रदान गरिने भएको छ । धान चुड्ने, गुन्द्री तथा चकटी बुन्ने प्रतियोगिता तथा परालको भारी हाल्ने प्रतियोगिताका बिजेताहरुलाई क्रमशः प्रथम, दितिय र तृतीयलाई ३, २ र १ हजार प्रदान गरिने भएको छ । दाँई महोत्सवले पर्यटकलाई ग्रामीण जीवन, कृषि संस्कार तथा स्थानिय उत्पादनको प्रत्यक्ष अनुभव गराउँदै पोखरा भ्रमण वर्षलाई समेत प्रबद्र्धन गर्ने भएको परिषदले विश्वास व्यक्त गरेको छ ।

चुरुङ्गा टोल विकास संस्थाका अध्यक्ष दयाराम गौतमले सो क्षेत्रमा झिनुवा जातको धान उत्पादनका लागि परिचित रहेको बताउनु भयो । परम्परागत धानहरु हाल लोप हुदै गरेको उहाँको भनाई थियो । पछिल्ला वर्ष कृषि पर्यटन, अर्गानिक उत्पादन र गाउँको प्राकृतिक सौन्दर्यका कारण चुरुङ्गा आकर्षक गन्तव्य बन्दै गएको गौतमको भनाई छ । महोत्सवमा करिब १ हजार पर्यटक तथा स्थानीयको उपस्थिति हुने अपेक्षा गरिएको छ । महोत्सवमा सहभागि हुनको लागि दुई वटा निःशुल्क बस सेवा समेत व्यबस्था गरिएको परिषदका महासचिव जीवनराज सापकोटाले बताउनु भयो ।