सूचना तथा संचार प्रविधिमन्त्री रेखा शर्माले संचारमाध्यमले सकारात्मक पक्षलाई जोड दिएर समाचार लेख्नुपर्ने कुरामा जोड दिएकी छिन्।

नेपाल पत्रकार महासंघ दाङले आज (सोमबार)देखि आयोजना गरेको ‘मिडिया महोत्सव’को उद्घाटन गर्दै उनले संचारमाध्यमले समाजमा रहेका नकारात्मक पक्षलाई प्राथमिकता दिनुभन्दा सकारात्मक पक्षलाई समेट्नुपर्नेमा जोड दिइन्।

नकारात्मक भूमिका निर्वाह गरिरहेका व्यक्ति तथा विषय प्राथमिकतासहित आउँदा त्यसले समाजलाई नकारात्मकतातर्फ लैजाने मन्त्री शर्माले बताइन्।

संचारमाध्याममा निराशाभन्दा आशाका कुरा बढी आउनुपर्नेमा उनले जोड दिइन्।

‘समाजमा केही नकारात्मक भूमिका निर्वाह गरिरहेका व्यक्ति पनि हुन्छन्। उनीहरुका विषय प्राथमिकतामा आउँदा समाज नकारात्मकतातर्फ जाने सम्भावना बढी हुन्छ’, मन्त्री शर्माले भनिन्, ‘यसले प्रशासन, पत्रकारितालगायत जुनसुकै क्षेत्रमा राम्रा मान्छे छैनन् भन्ने सन्देश जान्छ। त्यसैले हामीले सकारात्मक विषयवस्तुलाई समाचारमार्फत उजागर गर्न आवश्यक छ।’

संचारमाध्यामले विदेश जान लाइन लागेका व्यक्तिलाई समावेश गरिरहँदा विदेशबाट स्वदेश फर्किएर स्वरोजगार बनिरहेका, कृषि, व्यापार व्यवसाय तथा अन्य पेसाका माध्यमबाट समाजमा उदाहरणीय बनेका व्यक्तिका विषय समावेश नगर्दा युवापुस्तामा विदेश जान प्रेरणा मिल्ने गरेको मन्त्री शर्माको भनाई छ।

पत्रकार महासंघले मुलुकमा गणतन्त्र स्थापनाका लागि सुरुमा आवाज उठाएको भन्दै यसबाट प्राप्त उपलब्धि जोगाउन महासंघको भूमिका महत्वपूर्ण हुने उनले औंल्याइन्।

‘सञ्चारमाध्यम तथा महासंघले गणतन्त्र स्थापनामा अहोरात्र कलम चलाउँदा आज हामी लोकतान्त्रिक गणतन्त्रात्मक मुलुकका रुपमा परिचित भएका हौँ’, मन्त्री शर्माले भनिन्, ‘सञ्चारमाध्यमले हाम्रो संघर्ष र उपलब्धिका बारेमा नयाँ पुस्तालाई बुझाउन आश्यक छ।’

गणतन्त्र स्थापनाका साथै मुलुकमा अल्पसंख्यक, दलित, महिला, जनजाति, पिछडिएको वर्ग सत्ता संचालन गर्ने ठाउँमा पुगेको भन्दै यसलाई जोगाउन संचारमाध्यामले भूमिका निर्वाह गर्नुपर्नेमा उनले जोड दिइन्।

‘अहिले गलत गर्नेहरु दण्डित भइरहेका छन’, उनले भनिन्, ‘यो गणतन्त्रकै उपलब्धि हो।’

मुलुकमा संघीय लोकतान्त्रिक गणतन्त्रात्मक संविधान कार्यान्वयनको चरणमा रहेपनि पूर्ण कार्यान्वयन हुन नसकेको बताउँदै यसमा सबै राजनीतिक दल एकजुट भएर लाग्नुपर्ने मन्त्री शर्माको भनाई छ।

पत्रकारिता क्षेत्रलाई पुनःसंरचना गर्नु आजको आवश्यकता रहेको भन्दै उनले यसका लागि कानुन निर्माण अघि बढिरहेको जानकारी दिइन्।

अहिलेसम्म संचारमाध्यम परम्परागत कानुनहरुबाट संचालन भइरहेको बताउँदै मन्त्री शर्माले यसलाई पुनःसंरचना गर्नु अहिलेको अपरिहार्य आवश्यकता भएको बताइन्।

प्रेस काउन्सिललाई ‘मिडिया काउन्सिल’ बनाएर सबै किसिमका संचारमाध्यमलाई व्यवस्थित गर्ने तयारी भइरहेको उनले जानकारी दिइन्।

‘आमसञ्चार प्राधिकरणको कानुन पनि अन्तिम चरणमा छ। त्यो गठन भएपछि संचारमाध्यम तथा पत्रकारको क्षमता विस्तारमा महत्वपूर्ण भूमिका खेल्नेछ। साथै सरकारी संचारमाध्यमको पनि पुनःसंरचना हुन आवश्यक छ’, शर्माले उल्लेख गरिन्।

नेपाल टेलिभिजन, रेडियो नेपाललाई एकै ठाउँबाट संचालन गर्नुपर्ने उनको भनाई छ।

सामाजिक सञ्जाल विधेयक मन्त्रिपरिषद्मा लैजाने तयारी भइरहेको बताउँदै मन्त्री शर्माले साइबर सुरक्षा, दूरसंचार ऐन संशोधनका लागि अन्तिम तयारीमा रहेको जानकारी दिइन्।

आज (सोमबार)देखि सुरु भएको महोत्सव भोलिसम्म संचालन हुनेछ।

पत्रकार महासंघ दाङ शाखाको १२ औँ अधिवेशन तथा २२ औँ साधारणसभाका अवसरमा मिडिया महोत्सवको आयोजना गरिएको हो।

राससमा समाचार छ ।