पोखरा। गण्डकी प्रदेशमा यस वर्ष ९९ दशमलव ३९ प्रतिशत धान रोपाइँ भएको छ । कृषि, भूमि व्यवस्था तथा सहकारी मन्त्रालयका अनुसार हालसम्म ९३ हजार ६०६ हेक्टर क्षेत्रफलमा रोपाइँ सकिएको हो ।

‘साउन अन्तिमसम्ममा सबै क्षेत्रमा रोपाइँ भइसक्छ,’ मन्त्रालयका वरिष्ठ कृषि अर्थविज्ञ शशि अधिकारीले बताए । छिटपुटबाहेक अधिकांश ठाउँमा धान रोप्ने काम सकिएको उनले जानकारी दिए । गण्डकी प्रदेशमा कुल ४ लाख ७९ हजार ६१७ हेक्टर खेतीयोग्य जमिन छ । यसमध्ये बर्खे र चैत गरी करिब १ लाख हेक्टरमा धान खेती हुने गरेको छ ।

पछिल्लो समय प्रदेशमा धान खेतीको क्षेत्रफल भने बर्सेनि घट्दो क्रममा छ । ‘तथ्यांक हेर्दा रोपाइँ हुने क्षेत्रफल वर्षैपिच्छे कम हुँदै गएको देखिन्छ,’ अधिकारीले भने । ४ वर्षअघि ९७ हजार ७६९ हेक्टरमा बर्खे धान रोपिएको थियो । त्यसको अर्को वर्ष क्षेत्रफल घटेर ९६ हजार ५३ हेक्टरमा खुम्चिएको थियो । गत आर्थिक वर्षमा ९४ हजार १८२ हेक्टरमा मात्र रोपाइँ भएको थियो । जग्गा खण्डीकरण र बाँझो छाड्ने प्रवृत्तिले खेतीको क्षेत्रफल घटेको हो । खेतीयोग्य जमिनमा बस्ती विस्तार र पूर्वाधार विकासले पनि धान फल्ने जमिन नासिँदै गएको छ ।

मन्त्रालयले विभिन्न जिल्लाका क्षेत्रलाई धानको पकेट क्षेत्र तोकेको छ । गोरखाको छेवेटार, पालुङटार, आरुघाट र सिरानचोक यसमा पर्छन् । लमजुङका धमिलीकुवा, हर्राबोट, भोर्लेटार र करापुटारमा धानको राम्रो उत्पादन हुन्छ । तनहुँका चुँदीफाँट, सत्रसय फाँट र कलेस्तीफाँटलाई पकेट क्षेत्र मानिन्छ । कास्कीका मकैखोला, हाँडीखोला, पामे र लेखनाथ पनि धानका लागि प्रख्यात छन् ।