घरेलु टोली नेपाललाई हराउँदै बंगलादेशले २० वर्षमुनिको साफ च्याम्पियनसीप फुटबलको उपाधि जितेको छ।

ललितपुरको सातदोबाटोमा रहेको एन्फा कम्प्लेक्सको मैदानमा भएको फाइनलमा बंगलादेशले नेपाललाई ४–१ गोलले हरायो।

पहिलो हाफमा १ गोल गरेको बंगलादेशले दोस्रो हाफमा ३ गोल थप्यो।

बंगलादेशका लागि खेलको पहिलो हाफको इन्ज्युरी समयमा इस्लामले गोल गरे।

यस्तै, खेलको ५४ औं मिनेटमा गोयरी, ७० औं मिनेटमा राबी र इन्ज्युरी समयमा पिआसले गोल गरे।

नेपालका लागि खेलको ८१ औं मिनेटमा समिर तामाङले १ गोल फर्काए।

बंगलादेशले पहिलो पटक साफको उमेर समूहको उपाधि जितेको हो।

यसअघि, ३ पटकसम्म फाइनलमा पुगेको बंगलादेश उपाधिविहीन थियो।

यस्तै, नेपालले सन् २०१५ र २०१७ मा गरी २ उपाधि जितेको छ।

पहिलो सेमिफाइनलमा नेपालले टाइब्रेकर सुटआउटमा भुटानलाई ४–१ ले हराएर र दोस्रो सेमिफाइनलमा बंलादेशले पेनाल्टीमा भारतलाई ४–३ ले हराउँदै फाइनल पुगेको हो।