मकवानपुर । मकवानपुरको मनहरी गाउँपालिकामा एक जनाले आफ्नै साथीलाई साबेलले हिर्काएर हत्या गरेका छन् । मनहरी गाउँपालिका–६ प्रतापुर लच्का घर भएका अम्मरबहादुर लोप्चनले ५० वर्षीय जीतबहादुर मोक्तानलाई घरमा सुतिरहेका अवस्थामा साबेलले हिर्काएर हत्या गरेको प्रहरीले बताएको छ ।

आज बिहानपख साढे एक बजेको समयमा मोक्तानलाई एक्कासी साबेलले हानेको जिल्ला प्रहरी कार्यालय मकवानपुरले जनाएको छ । टाउको र खुट्टामा चोट लागेर गम्भीर घाइते भएका मोक्तानको उपचारको क्रममा भरतपुर अस्पताल चितवनमा आज बिहान साढे ३ बजे मृत्यु भएको प्रहरी नायब उपरीक्षक श्यामु अर्यालले बताए ।

डिएसपी अर्यालका अनुसार मोक्तान र लोप्चनसँगसँगै निर्माण क्षेत्रमा मजदुरी गर्ने गर्दछन् । लोप्चनलाई प्रहरीले साबेलसहित नियन्त्रणमा लिएको छ । एक्कासी साबेल किन प्रहार गरे भन्ने विषयमा अनुसन्धान भइरहेको अर्यालले जानकारी दिए ।