काठमाडौं । नेपाल प्रिमियर लिग(एनपिएल) मा आज  पनि  दुई खेल हुदैंछ । पहिलो खेलमा  लुम्बिनी लायन्स र जनकपुर बोल्ट्सबीच कीर्तिपुरस्थित टियु मैदानमा खेल बिहान ९ बजे सुरु हुनेछ।

लुम्बिनीले सुरुवाती तीन खेलमा हार बेहोरेर दबाबमा छ। आजको खेलमा जित हात नपारे लुम्बिनीको प्लेअफ सम्भावना कठिन बन्नेछ । पहिलो खेलमा विराटनगर किंग्ससँग हारेको लुम्बिनीले पोखरा एभेन्जर्स र सुदूरपश्चिम रोयल्सविरुद्धको खेल पनि गुमाएको थियो । जनकपुरभने लगातार चौथो जित निकाल्दै प्लेअफ सम्भावना थप बलियो बनाउन चाहान्छ । जनकपुरले विराटनगर, कर्णाली तथा पोखरालाई पराजित गरेको थियो ।

आजै दोस्रो खेलमा सुदूरपश्चिम र चितवनबीच  दिउँसो १ बजे  खेल सुरु हुनेछ । सुदूरपश्चिम लगातार चौथो जित निकाल्दै प्लेअफ सम्भावना बलियो बनाउने लक्ष्यमा रहेको छ । सुदूरपश्चिमले पहिलो खेलमा विराटनगर, दोस्रोमा काठमाडौं गुर्खाज र तेस्रो खेलमा लुम्बिनीलाई पराजित गरेको थियो ।

सुरुवाती दुई खेल जितेको चितवन पछिल्लो खेलमा भने पराजित भएको थियो । काठमाडौं र पोखरालाई पराजित गरेको चितवन तेस्रो खेलमा कर्णालीसँग हारेको थियो । ८ टोलीको सहभागिता रहेको एनपिएल पुस ६ गते सम्म चल्ने छ ।