पोखरा । पोखरा महानगरपालिकाले पृथ्वीचोकस्थित बसपार्क अगाडिको संस्थान क्षेत्रमा रहेका संरचना भत्काउन सुरु गरेको छ । सडक विस्तार गर्ने उद्देश्यले बिहीबार ती संरचनामा डोजर चलाइएको हो । यहाँ साहारा क्लब र सामुदायिक प्रहरी सेवा केन्द्रका भवन थिए । हिमाली सांस्कृतिक परिवारका संरचना पनि महानगरले भत्काएको छ । नगर प्रमुख धनराज आचार्यले सार्वजनिक जग्गा संरक्षण गर्न यो अभियान थालिएको बताए ।

यो क्षेत्रमा नेपाली कांग्रेस र नेकपा एमाले निकट मजदुर संगठनका कार्यालय पनि थिए । महानगरले ट्रेड युनियन कांग्रेस र जिफन्ट गण्डकीका संरचना हटाउन सुरु गरेको छ । यी संस्थाहरुले पोखरा उपत्यका नगर विकास समितिको जग्गा भोगचलन गर्दै आएका थिए । केही संस्थाले संरचना बनाएर भाडासमेत उठाउने गरेको पाइएको छ । नेकपा निकट मजदुर संगठनले भने यसअघि नै आफ्नो संरचना भत्काएर चाबी बुझाइसकेको थियो । हङकङ बजार अगाडिका व्यवसायीले बुधबार राति नै सामान सारेर ठाउँ खाली गरिदिएका थिए । साहारा क्लबले सञ्चालन गरेको सार्वजनिक शौचालय पनि यही ठाउँमा छ । महानगरले संरचना हटाउन ३५ दिनको अन्तिम सूचना दिएको थियो । उक्त म्याद जेठ ९ गते नै सकिएको थियो । सूचनाको म्याद सकिएपछि महानगरले डोजर चलाउने निर्णय गरेको हो ।

महानगरको आग्रहपछि अमरसिंह चोकका टहरा व्यवसायी आफैले हटाएका छन् भने फिर्केमा डोजर चलिरहेको छ