शनिबार, १४ भदौ २०८२
शनिबार, १४ भदौ २०८२
काठमाडौं । उपसभामुख इन्दिरा रानाविरुद्ध पदअनुकूल आचरण नगरेको प्रस्ताव दर्ता गर्ने तयारी गरेको कांग्रेस र एमाले अन्तिम समयमा पछि हटेका छन्। सोमबार बिहान प्रधानमन्त्रीले बालुवाटारमा बोलाएको बैठकमै मंगलबार प्रस्ताव दर्ता गर्ने निष्कर्ष निकालिएको भएपनि विभिन्न दल र आफ्नै नेताहरूको असहमति देखिएपछि दुवै दल पछि सरेका हुन्।
सत्तारुढ कांग्रेस र एमालेले प्रस्ताव दर्ता गर्न जसपा नेपाल, लोसपा, नागरिक उन्मुक्ति र जनमतसँग सिंहदरबारमा छलफल गरे पनि साना दलहरूले राना विदेशमै रहेका बेला हस्ताक्षर नगर्ने अडान राखे। नागरिक उन्मुक्तिकी अध्यक्ष रञ्जिता श्रेष्ठले भने खाली पानामा हस्ताक्षर गरेकी थिइन्, तर जनमतकी अनिता देवी र जसपाकी रेखा यादवले विदेशमा भएकी उपसभामुखलाई प्रष्टिकरणको अवसर नदिइकन प्रस्ताव दर्ता गर्नु अनुचित हुने तर्क गरे।
कांग्रेसभित्रै पनि नेतृत्वको कदमप्रति असन्तुष्टि देखियो। सभापति देउवाले मंगलबार पदाधिकारी बैठकमा संवैधानिक परिषद्मा अल्पमत, जसपा नेपाल र जनमतको समर्थन र उपसभामुख हटे कांग्रेसकै उम्मेदवार हुने तीन कारण बताए पनि महामन्त्री गगन थापा, प्रवक्ता प्रकाशशरण महत र नेता अर्जुननरसिंह केसीले पुनर्विचार गर्न सुझाव दिए। रुपन्देहीमा उपनिर्वाचन नजिकिएको बेला यस्तो कदमले पार्टीलाई नोक्सान पुर्याउने चेतावनी पनि दिइयो।
उपसभामुख राना साउन ३० गते एनजिओ फोरमको कार्यक्रममा सहभागी हुन अमेरिका गएकी थिइन् र भदौ १३ गते फर्कने कार्यक्रम छ। कानुनअनुसार प्रस्ताव दर्ता भए सात दिनभित्र छलफल सुरु गर्नुपर्छ, तर राना उपस्थित नै नहुँदा प्रष्टिकरणको मौका नपाउने स्थिति आउँथ्यो। यस कारण पनि कांग्रेस–एमाले पछि हटेका हुन्।
विपक्षी दल माओवादी र अन्य साना दलहरूले दुई ठूला दलको कदमलाई गैरलोकतान्त्रिक भन्दै संसद्मा तीव्र आपत्ति जनाए। माओवादी उपमहासचिव शक्ति बस्नेतले विदेशमा रहेकी महिला उपसभामुखलाई लक्षित गर्ने कार्य समावेशिता र लोकतान्त्रिक अभ्यासविपरीत भएको बताए। रास्वपाका सचेतक सन्तोष परियारले कार्यपालिका संसद्को मर्यादामाथि प्रहार गर्न खोजेको आरोप लगाए भने स्वतन्त्र सांसद अमरेशकुमार सिंहले दुई दल साना दललाई तर्साउने रणनीतिमा लागेको टिप्पणी गरे।
यसबीच कांग्रेसभित्रै शेखर कोइराला, गगन थापा र विश्वप्रकाश शर्माजस्ता नेताहरूले नेतृत्वको निर्णयप्रति असहमति जनाए। उनीहरूले संस्थागत छलफलबिनै बालुवाटारमा बनेको सहमति कार्यान्वयन गर्न नहुने बताए। यस्तै, एमालेका प्रमुख सचेतक महेश बर्तौलाले पनि विदेशमा रहेका बेला प्रस्ताव दर्ता नगर्ने प्रष्ट पारे। यसरी, प्रारम्भिक सहमतिसहित अघि बढेको उपसभामुखविरुद्धको प्रस्ताव कांग्रेसभित्रको मतभेद, साना दलहरूको असहमति र राना विदेशमै रहेका कारण तत्काल रोकिएको छ। कांग्रेस र एमालेले अब राना फर्किएपछि मात्र अर्को कदम चाल्ने बताएको छ।
