मोरङ असोज ५ । मोरङको पथरीमा ज्वाइले ससुराको हत्या गरेका छन् । पथरीशनिश्चरे नगरपालिका–७ स्थित मायालु चोकका ६० वर्षीय चन्द्रबहादुर तामाङको हत्या भएको प्रहरीले बताएको छ ।

प्रहरीका अनुसार शनिबार बिहान हत्या गरिएको अवस्थामा चन्द्रबहादुरको शव उनकै घरमा भेटिएको हो । इलाका प्रहरी कार्यालय पथरीका अनुसार धारिलो हतियार प्रहारबाट हत्या भएको देखिएको छ ।

घरमा तामाङ र उनको ज्वाईं अन्दाजी २५ वर्षीय रविन राई बस्दै आएकोमा घटनापछि रविन फरार छन् । चन्द्रबहादुरकी श्रीमती र छोरी (रविनकी पत्नी) रोजगारीको लागि विदेशमा छन् ।

प्रहरीका अनुसार शुक्रबार राति घरमै मदिरा सेवन गरेका ज्वाईं र ससुराबीच विवाद भएको थियो । बिहान स्थानीयले शव देखेपछि प्रहरीलाई खबर गरेका थिए । फरार रहेका रविनको खोजी कार्य भइरहेको प्रहरीले बताएको छ ।