आईसीसी महिला टी–ट्वान्टी विश्वकप एसिया क्षेत्र छनोटमा नेपालले कतारलाई पराजित गदै प्रतियोगिताको सेमिफाइनलमा स्थान बनाएको छ।

मलेसियाको बांगीमा आज (सोमबार) भएको खेलमा नेपालले कतारलाई ९ विकेटले पराजित गर्दै सेमिफाइनल यात्रा तय गरेको हो।

प्रतियोगितामा नेपालको यो लगातार चौथो जित हो।

यसअघि, नेपालले सुरुआती खेलमा घरेलु टोली मलेसियालाई ५ रनले हराएको थियो।

त्यस्तै, दोस्रो खेलमा बहराइनलाई १० विकेट हराएको थियो।

यसैगरी, तेस्रो खेलमा भुटानलाई ३ विकेटले पराजित गरेको थियो।

समूह ‘ए’ बाट नेपालले एक खेलअगावै सेमिफाइनलमा आफ्नो स्थान पक्का गरेको हो।

जितको लागि ७५ रनको सामान्य विजयी लक्ष्य पछाएको नेपालले १० दशमलव ३ ओभरमा १ विकेट गुमाउँदै पूरा गर्‍यो।

नेपालको जितमा काजल श्रेष्ठले सर्वाधिक ३२ रनको योगदान दिइन्।

काजलले २८ बलमा ४ चौकासहित ३२ रन जोडिन्।

त्यस्तै, इन्दु बर्मा १२ बलमा ३ चौकासहित २० रनमा अविजित रहिन्।

सीता रानामगर २३ बलमा १७ रनमा अविजित रहिन्।

त्यसअघि, टस हारेर पहिला ब्याटिङको निम्तो पाएको कतारले निर्धारित २० ओभरमा ७ विकेट गुमाउँदै ७४ रनको योगफल बनाएको थियो।

कतारकी साची धडवालले ४४ बलमा १ चौकासहित सर्वाधिक २१ रनको योगदान दिइन्।

त्यस्तै, एलिना खानले १५, एन्जिली मारेले अविजित १४ तथा कप्तान आयशाले १० रन बनाइन्।

नेपालका लागि इन्दु बर्माले ३ विकेट लिइन् भने पूजा महतो र कविता जोशीले समान १/१ विकेट लिए।

नेपालले समूह चरणको अन्तिम खेल बुधबार युएईसँग खेल्नेछ।