पोखरा । नेपालको पाेखराबाट अष्ट्रेलियाको भ्रमणमा गएका नेपाल पत्रकार महासंघका पूर्व केन्द्रीय उपसभापति गंगाधर पराजुली र भिक्टोरिया राज्यको मेलबर्नमा रहेका गैर आवाशीय नेपालीबीचमा भेटघाट तथा अन्तरक्रिया कार्यक्रम भएको छ। उक्त भेटघाट कार्यक्रममा गैर आवाशीय नेपालीहरुको संस्था एनआरएनए भिक्टोरियाको तर्फबाट पराजुलीलाइ  खादा लगाएर सम्मान गरिएको थियो।

केही साताको पारिवारिक भ्रमणको लागि अष्ट्रेलियामा रहेका पराजुली नेपाल सरकारको न्युनतम पारिश्रमिक निर्धारण समितिको पूर्व अध्यक्ष समेत हुन । हाल नेपाली काँग्रेसको केन्द्रीय सूचना संचार तथा प्रचार प्रसार विभागका सदस्य र गुरुकुल खबर डटकमका अध्यक्ष एबम प्रधान सम्पादक रहेका पराजुलीलाई आरएनए भिक्टोरियाको कार्यालय मेलबर्नमा आयोजित भेटघाट कार्यक्रमको अबसरमा सम्मान गरिएको हो।

भेटघाट तथा सम्मान कार्यक्रममा पराजुलीलाई एनआरएनए भिक्टोरियाको कार्यसमितिमा रहेका एबम नेपाली समुदायका अगुवाहरुले खादा लगाएर सम्मान गरेका थिए । कार्यक्रममा एनआरएनए भिक्टोरियाको तर्फबाट एनआरएनएका पूर्व अध्यक्ष बिनीतराज शर्मासहित प्रबक्ता बबिन मिश्र, नेपाली काँग्रेसका युवा नेता एबम नेपाल तरुण दल सोलुखुम्बुका पूर्व अध्यक्ष देबेन्द्र बस्नेत, एनआरएनएका अन्तराष्ट्रिय समन्वय समितिका सदस्य मदनराज पौडेल, एनआरएनए भिक्टोरियाका युवा संयोजक सिद श्रेष्ठ सहित सुमन गुरुङ ‘आइटी’, सुरज अधिकारी लगायतले खादा लगाएर सम्मान गरेका थिए। सोहि कार्यक्रममा पराजुलीकी धर्मपत्नी सुशिला पराजुली र नेविसंघको केन्द्रीय सदस्यमा हालै मनोनित सुनील बिष्टलाई पनि सम्मान गरिएको थियो।

त्यस अबसरमा एनआरएनए भिक्टोरियाका पूर्व अध्यक्ष बिनित शर्माले नेपाल सरकार र नेपालका प्रमुख राजनीतिक दलहरुले बिदेशमा रहेका नेपालीहरुलाई विभिन्न बहानामा फुटाउने र आंफ्नो व्यक्तिगत स्वार्थमा प्रयोग गर्न भन्दा देशको विकास र समृद्धिको लागि प्रयोग गर्नुपर्नेमा जोड दिए। नेपाली समुदायका अगुवा एवम नेपाली काँग्रेसका युवा नेता देबेन्द्र बस्नेतले राजनीतिक दलका नेताहरुले प्रवासमा रहेका नेपालीहरुलाई आंफ्नो अनुकुल प्रयोग गर्न खोज्दा गैर आवाशीय नेपाली संघसहित नेपाली जनसम्पर्क समितिमा समेत आन्तरिक विवाद उत्पन्न भएको भन्दै पिडा पोखे।

कार्यक्रममा बोल्दै पराजुलीले विदेशमा रहेका नेपालीहरुको शिप, दक्षता र अनुभवसहित श्रोतको सदुपयोग गर्न सके नेपालको बिकासमा सहयोग पुग्ने बताउँदै एनआरएनएलाई विभाजित हुन नदिन सबै गम्भीर बन्न आग्रह गरे। योग्यता र क्षमताको आधारमा संस्थाको नेतृत्व सम्हाल्नुपर्ने भएपनि कुनै दल वा नेता बिशेषको प्रभाव र दवाबका कारण नेतृत्व लिनुपर्ने वा सुम्पिनुपर्ने अबस्थाका कारण संस्थाहरुमा विवाद बढ्ने पराजुलीको भनाई थियो।

कार्यक्रममा एनआरएनएका अन्तराष्ट्रिय समन्वय समितिका सदस्य मदनराज पौडेल, एनआरएनए भिक्टोरियाका युवा संयोजक सिद्द श्रेष्ठ, नेपाल बिद्यार्थी संघका केन्द्रीय सदस्य सुनील बिष्ट, विभिन्न संघ संस्थामा सक्रिय युवा सुमन गुरुङ र सुरज अधिकारी लगायतले गैर आवाशीय नेपालीहरुलाई नेपालका दल र सरकारले नेपालको हितमा उपयोग गर्नुपर्ने धारणा राखेका थिए ।