पोखरा ३० भदौ । पोखरा उद्योग वाणिज्य संघको अध्यक्षमा गोकर्ण कार्की विजयी भएका छन् । कार्कीले १३ सय ३९ मत ल्याएर विजयी भएका हुन् । उनका प्रतिष्पर्धी अर्जुन पोखरेलले ८ सय ५१ मत प्राप्त गरे । कार्कीले ४ सय ८८ मतले पोखरेललाई पराजित गरेका हुन् । पोखरेल प्यानल बनाएर चुनावी मैदानमा उत्रीएका थिए भने कार्की एक्लै चुनावी मैदानमा थिए ।

पोखरेल प्यानलबाट ५ जना पदाधिकारी निर्विरोध भएका थिए । उपमहासचिवमा पोखरेल प्यानलका बालकृष्ण कोइरालालाई पराजित गर्दै सुदीप प्रधानांग विजयी भएका छन् । प्रधानांगले ११ सय ७७ मत पाउँदा कोइरालाले १ हजार ४७ मत ल्याएका छन् । १ सय ३० मत अन्तरले सुदीप विजयी भएका हुन् ।

निर्वाचनबाट सदस्यमा देवेन्द्र प्रजू, सौगात थापा, ललितबहादुर कुँवर, भीम गौतम, दूधमान गुरुङ, जीवनप्रकाश श्रेष्ठ, टीकाराम सुवेदी, रामचन्द्र तिमिल्सिना, प्रदीप राजभण्डारी र यादवराज पोखरेल निर्वाचित भएका छन् ।

१० खुला सदस्यमा १४ जनाको उम्मेदवारी परेको थियो । उम्मेदवारी दिएका लेखनाथ सुवेदी, विष्णुप्रसाद तिमिल्सिना, विनोद केसी र प्रेमप्रसाद सुवेदी भने पराजित भएका छन् । विजयी मध्ये ८ जना अर्जुन प्यानलका थिए ।