पोखरा । जागरुक नागरिक समाज, नेपाल कास्कीले इम्बोस्ड नम्बर प्लेटको कार्यान्वयन प्रक्रियामा देखिएका समस्या र जनगुनासो तत्काल सम्बोधन गर्न सरकारसँग माग गरेको छ ।

समाजका अध्यक्ष रामहरि ढुंगानासहितको टोलीले शुक्रबार कास्कीका सहायक प्रमुख जिल्ला अधिकारी शिव लम्सालमार्फत् भौतिक पूर्वाधार तथा यातायात मन्त्रालयलाई बुझाएको ज्ञापनपत्रमा इम्बोस्ड नम्बर प्लेटबारे तीव्र असन्तोष, विरोध र जनगुनासो देखिएको उल्लेख छ ।ज्ञापनपत्रमा भनिएको छ,“आधुनिक र डिजिटल प्रणाली लागू गर्ने सरकारको प्रयास सराहनीय भएपनि यसको कार्यान्वयनमा गम्भीर समस्या देखिएकाले त्यसप्रति सरकार गम्भीर हुनुपर्दछ।” समाजले नम्बर प्लेटको मूल्य बढी, प्राविधिक तथा व्यवहारिक कठिनाइ, पारदर्शिताको कमी, जनचेतनाको अभाव, नेपाली भाषाको उपेक्षाका विषयलाई जोडदार रुपमा उठाएको छ ।

समाजले नम्बर प्लेटको मूल्य मध्यम तथा निम्न आय भएका सवारी धनीका लागि वहन गर्न गाह्रो भएको जनाइएको छ । नामसारीका लागि अनिवार्य रूपमा सवारीधनीको उपस्थितिको प्रावधानले विदेशमा रहेका वा अनुपस्थित धनीका परिवारलाई असुविधा भएको समाजको दाबी छ ।इम्बोस्ड नम्बर प्लेट खरिद प्रक्रिया तथा विदेशी कम्पनीको भूमिकाबारे स्पष्टता नहुँदा जनस्तरमा अविश्वास बढेको समाजले उल्लेख गरेको छ । नम्बर प्लेटमा देवनागरी लिपि हटाउँदै लैजाने संकेत देखिएकाले नेपाली भाषाको अस्मितामा प्रहार हुने चेतावनी समाजले दिएको छ ।

ज्ञापनपत्रमा समस्याहरू समाधान नगरी निरन्तर कार्यान्वयन गर्दा विरोध, आन्दोलन र असन्तोष चर्किन सक्ने चेतावनी दिइएको छ । साथै, मन्त्रालयले हालको नीति पुनरावलोकन गरी लागतमा सहुलियत, पारदर्शिता सुनिश्चित गर्ने तथा नेपालको सामाजिक–आर्थिक सन्दर्भअनुकूल विकल्प प्रस्तुत गर्नुपर्ने माग गरिएको छ । समाजले मन्त्रालयलाई तत्काल प्रभावकारी कदम चालेर जनताको विश्वास कायम राख्न आग्रह गरेको छ । ज्ञापनपत्र बुझ्दै सहायक प्रमुख जिल्ला अधिकारी लम्सालले ज्ञापनपत्रलाई सम्बन्धित निकायमा तत्काल पठाउने बताउनुभयो ।