पोखरा। सिन्धुलीको गोलन्जोर गाउँपालिका–६ छेत्पाबाट चार दिनदेखि सम्पर्कविहीन भएको एकै परिवारका सोह्र जना सदस्य पोखरामा सकुशल फेला परेका छन् । जिल्ला प्रहरी कार्यालय कास्कीले उनीहरूलाई पोखरा महानगरपालिका–३० स्थित गगनगौंडा भन्ने ठाउँबाट फेला पारेको हो ।

प्रहरीको अनुसन्धानका क्रममा उनीहरू गाडी रिजर्भ गरेर पोखरा आएको खुलेको छ । कास्कीका प्रहरी प्रमुख (एसपी) श्यामबाबु ओलियाका अनुसार, उनीहरुले बीस हजार रुपैयाँमा गाडी भाडामा लिएर पोखरा आएका थिए । शनिबार पोखरा पुगेर उनीहरू लेकसाइडस्थित होटल जननीमा तीनवटा कोठा लिएर बसेका थिए र आइतबार होटलबाट निस्किएका थिए ।

सोमबार सञ्चारमाध्यममा परिवार हराएको समाचार प्रकाशन र प्रसारण भएपछि होटल सञ्चालक सुनिल भुर्तेलले प्रहरीलाई खबर गरेका थिए । प्रहरीले सीसीटीभी फुटेजको आधारमा उनीहरुको खोजी गर्दा गगनगौंडाको सोमनाथ पौडेल र चन्द्र भण्डारीको घरमा डेरा लिएर बसेको अवस्थामा फेला पारेको हो । उनीहरूले पोखरामा ज्यामी काम गर्नका लागि आएको बताएका छन् । प्रहरीले उनीहरूलाई इलाका प्रहरी कार्यालय सिसुवामा लगेर आवश्यक सोधपुछ गरी आफन्तको जिम्मा लगाउने प्रक्रिया अगाडि बढाएको छ । सोह्र जनामध्ये एक छोरी सुजाता हायू भने आफ्ना श्रीमानसँग काठमाडौंमा बस्दै आएको खुलेको छ ।