पोखरा । लेखनाथ उद्योग वाणिज्य संघको यही २० र २१ भदौमा १९ औं साधारण सभा तथा १५ औं अधिवेशन हुँदैछ । अधिवेशन अन्तर्गत शुक्रबार उम्मेदवारी दर्ता भएको छ । आगामी नयाँ कार्यसमितिका लागि ३८ जनाले उम्मेदवारी दिएका छन् । निर्वाचन आयुक्त वरिष्ठ अधिवक्ता खगेन्द्रराज आचार्यका अनुसार उम्मेदवारलाई आइतबार दिउँसो ३ बजेसम्म मनोनयन फिर्ता लिने समय तोकिएको छ । त्यसपछि, सोही दिन अन्तिम नामावली प्रकाशित गरिने आचार्यले बताए ।

मतदान २१ भदौ बिहान ७ बजेदेखि हुने जनाइएको छ । संघको नयाँ नेतृत्वका लागि हालका वरिष्ठ उपाध्यक्ष राजेन्द्र ओझा र महासचिव जानुका पराजुली अधिकारी प्यानल बनाएर चुनावी मैदानमा छन् । १९ सदस्यीय कार्यसमितिका लागि ओझा र जानुका प्यानलले आ–आफ्नो उम्मेदवारी दर्ता गराएकामा २ कार्यकाल संघको कार्यसमिति सदस्य रहेका बुद्धिप्रसाद बास्तोलाले उपमहासचिव पदमा स्वतन्त्र उम्मेदवारी दिए । संस्थागत सदस्यमा होटल तथा रेस्टुरेन्ट एसोसिएसन लेखनाथबाट वीरभद्र कँडेलको एकल उम्मेदवारी परेको छ ।

ओझा प्यानलबाट वरिष्ठ उपाध्यक्षमा उपेन्द्रराज सुवेदी (राजु), प्रथम उपाध्यक्षमा मेनुका श्रेष्ठ, द्वितीय उपाध्यक्षमा धीरजकुमार श्रेष्ठ, महासचिवमा जीवन तिवारी, उपमहासचिवमा लक्ष्मीप्रसाद ढुंगाना (एलपी) र कोषाध्यक्षमा टीकाराम सापकोटाले उम्मेदवारी दिएका छन् । पराजुली प्यानलबाट वरिष्ठ उपाध्यक्षमा गोपीचन्द्र बास्तोला, प्रथम उपाध्यक्षमा विक्रम कर्माचार्य, द्वितीय उपाध्यक्षमा ध्रुवबाबु भट्टराई (आई.डि.), महासचिवमा भरतराज ओझा, उपमहासचिवमा गंगाकुमारी मल्ल र कोषाध्यक्षमा हरि बस्ताकोटीले मनोनयन दिएका छन् ।

१९ सदस्यीय कार्यसमितिमा ८ खुला सदस्यका लागि १६ जनाले मनोनयन दिएका छन् । ओझा प्यानलबाट घनश्याम ढुंगाना, किशोर अधिकारी, कृष्णप्रसाद सुवेदी, नवराज पौडेल, सन्तोष हमाल, शिवराज अधिकारी, सुरेन्द्र गुरुङ, भीमप्रसाद सुवेदी (सन्तोष) प्रतिस्पर्धामा छन् । पराजुली प्यानलबाट खुला सदस्यमा प्रतीक्षा रानाभाट, प्रभाकुमारी पौडेल लामिछाने, वीरेन्द्रराज भूर्तेल, भविन्द्र पुन (भविन), सुजन न्यौपाने, दीपक अधिकारी, कृष्णप्रसाद तिमिल्सिना र सन्दीप बुढाथोकी छन् । २ महिला सदस्यका लागि सपना सुवेदी, लक्ष्मी ठाकुर (सुनार), गंगा सापकोटा परियार र शर्मिला श्रेष्ठको मनोनयन परेको छ । तीमध्ये सपना र लक्ष्मी ओझा प्यानलका हुन् ।

१ एसोसिएट सदस्यमा प्रवेश बञ्जरा र दयाराज भण्डारी छन् । तीमध्ये प्रवेश चाहिँ ओझा प्यानलका हुन् । संस्थागत सदस्यमा वीरभद्र कँडेल दुवै समूहका साझा उम्मेदवार रहेकाले एकल उम्मेदवारी परेको हो । उनी निर्विरोध भएपनि निर्वाचन समितिले आधिकारिक घोषणा गर्न बाँकी छ ।