पोखरा । राष्ट्रिय स्वतन्त्र पार्टी (रास्वपा) का सभापति एवम पूर्व गृहमन्त्री रवि लामिछानेमाथि तीन वटा अभियोगमा मुद्दा चलाउन सिफारिस गरेको छ ।

कास्की प्रहरीले लामिछानेमाथि सहकारी ठगी, संगठित अपराध र सम्पत्ति शुद्धीकरणसम्बन्धी कसूरमा अनुसन्धान गरी जिल्ला सरकारी वकिल कार्यालयमा प्रतिवेदन बुझाउँदै मुद्दा चलाउन सिफारिस गरेको हो ।रायसहितको अनुसन्धान प्रतिवेदन छ सय पेज लामो रहेको प्रहरीले बताएको छ । प्रहरीले रवि लामिछानेसहित ५१ जनालाई प्रतिवादी बनाउन राय दिएको छ।

प्रहरीले सोमबार प्रतिवेदन बुझाएको भए पनि अध्ययन गर्न समय लाग्ने जिल्ला सरकारी वकिल कार्यालयले बताएको छ ।गत कार्तिक २ गते पक्राउ परेका रवि लामिछाने दुई महिनादेखि प्रहरीको हिरासतमा छन् ।

कास्की जिल्ला अदालतले बिहीबार अनुसन्धानका लागि हिरासतमा राख्न सातौँ पटक म्याद थप गरेको थियो  पाँच वटा सहकारीबाट लिएको रकम हिनामिना देखिएको भन्दै रवि र छविलाई कास्कीसँगै रुपन्देही, काठमाडौँ, चितवन र पर्सामा लगेर बयान गराइएको थियो । जीबी राई भने फरार छन् ।