काठमाडौं । सर्वोच्च अदालतले धनुषा क्षेत्र नम्बर १ को निर्वाचन विवादसम्बन्धी रिटमा रास्वपाका उम्मेदवार किशोरी साहको पक्षमा अन्तरिम आदेश दिन अस्वीकार गरेको छ। अदालतको उक्त निर्णयसँगै सो क्षेत्रबाट निर्वाचित नेपाली कम्युनिष्ट पार्टीका सांसद मात्रिका यादवको पद यथावत रहने भएको छ।

आइतबार सर्वोच्च अदालतमा भएको प्रारम्भिक सुनुवाइपछि अदालतले तत्काल अन्तरिम आदेश जारी गर्नुपर्ने पर्याप्त आधार नदेखिएको भन्दै निवेदकको माग अस्वीकार गरेको हो। यससँगै विवादको अन्तिम टुंगो नलागेसम्म यादवको सांसद पदमा कुनै असर नपर्ने भएको छ।

रास्वपाका उम्मेदवार साहले निर्वाचन प्रक्रियामा त्रुटि भएको र त्यसको असर परिणाममा परेको दाबी गर्दै निर्वाचन आयोगको निर्णयविरुद्ध सर्वोच्च अदालतमा रिट दायर गरेका थिए। उनले निर्वाचन परिणाम कार्यान्वयन रोक्न र पुनः जाँच गर्न अन्तरिम आदेश माग गरेका थिए। तर अदालतले प्रारम्भिक रूपमा दुवै पक्षको दाबी अध्ययन गर्दा तत्काल हस्तक्षेप गर्नुपर्ने अवस्था नदेखिएको ठहर गरेको छ। त्यसैले अन्तरिम आदेश जारी नगरी मुद्दालाई नियमित प्रक्रियामै अघि बढाउने निर्णय गरिएको हो।

यस निर्णयपछि धनुषा–१ बाट निर्वाचित सांसद मात्रिका यादवको पद सुरक्षित भएको छ भने मुद्दा भने सर्वोच्च अदालतमा विचाराधीन रहनेछ। अदालतले आगामी सुनुवाइमा दुवै पक्षलाई थप बहसका लागि बोलाउने अपेक्षा गरिएको छ।

उक्त क्षेत्रको निर्वाचन परिणामलाई लिएर राजनीतिक रूपमा पनि चासो देखिएको थियो। रास्वपाले चुनावी प्रक्रियामा भएका केही निर्णयप्रति असन्तुष्टि जनाउँदै अदालतको ढोका ढकढक्याएको थियो।

अब सर्वोच्च अदालतको अन्तिम फैसला आउँदासम्म उक्त क्षेत्रको प्रतिनिधित्व भने हाल निर्वाचित सांसदमार्फत नै कायम रहनेछ।