आज बिहान १० बजेदेखि दिउँसो ३ बजेसम्म उम्मेदवारको मनोनयन पत्र दर्ता गर्ने कार्यक्रम रहेको आयोगले जनाएको छ । आयोगका अनुसार यही पुस २४ गते उम्मेदवारको विरोधमा उजुरी दिने, पुस २७ गते उम्मेदवारले चाहेमा नाम फिर्ता लिने र सोही दिन दिउँसो अन्तिम नामावली प्रकाशन गर्ने कार्यक्रम छ । साथै यही पुस २८ गते उम्मेदवारलाई निर्वाचन चिन्ह प्रदान गरिनेछ ।

आगामी माघ ११ गते बिहान ९ बजेदेखि दिउँसो ३ बजेसम्म मतदान हुने गरी तोकिएको छ । राष्ट्रियसभामा आगामी फागुन २० गतेदेखि १८ सदस्यको पद रिक्त हुँदैछ । आयोगले राष्ट्रिय जनगणना, २०७८ अनुसार मतदाता र मतभार सार्वजनिक गरिसकेको छ । राष्ट्रियसभा सदस्य निर्वाचनमा प्रदेशसभा र स्थानीय तहका प्रमुख एवम् उपप्रमुख, अध्यक्ष र उपाध्यक्ष मतदाता छन् ।

गण्डकीमा २ पदमा चुनाव  

गण्डकी प्रदेशमा रिक्त हुन लागेका दुई सदस्य पदका लागि माघ ११ गते निर्वाचन हुँदैछ । तत्कालीन नेकपा (माओवादी केन्द्र) का नेता नारायणकाजी श्रेष्ठ र नेकपा (एमाले) की नेतृ भगवती न्यौपानेको ६ वर्षे कार्यकाल पूरा हुन लागेकाले गण्डकीमा २ पदमा चुनाव हुन लागेको हो ।

महिला र अन्य क्लस्टरतर्फ निर्वाचन हुने निर्वाचन अधिकृतको कार्यालयले जानकारी दिएको छ । राष्ट्रिय सभा निर्वाचनमा यो पटक मतभार परिवर्तन भएको निर्वाचन कार्यालयले जानकारी दिएको छ । प्रदेश सभा सदस्यको मतभार ४८ बाट बढेर ५३ पुगेको छ भने स्थानीय तहका प्रमुख र उपप्रमुखको मतभार १८ बाट बढेर १९ कायम भएको ढकालले बताउनुभयो । ६० सदस्यीय गण्डकी प्रदेश सभामा दीपक मनाङे भनिने राजीव गुरुङको पद खारेज भएको छ । गण्डकी प्रदेशमा सबै भन्दा बढी नेपाली कांग्रेसको मतभार छ । नेपाली कांग्रेसका प्रदेश सभा सदस्य २७ जनाको मत भार १ हजार ४ सय ३१ र स्थानीय तहका ६७ जनप्रतिनिधिको १ हजार २ सय ७३ मतभार गरी २ हजार ७ सय ४ छ । नेकपा एमालेका २२ प्रदेश सांसदको मत भार १ हजार १ सय ६६ र स्थानीय तहमा ७० जनप्रतिनिधिको मत भार १ हजार ३ सय ३० सहित २ हजार ४ सय ९६ मतभार रहेको छ ।

नेकपा (माओवादी केन्द्र) र एकीकृत समाजवादी समूहसँग ७ सांसदको ३ सय ७१ मतभार र ३० स्थानीय जनप्रतिनिधि ५ सय ७० गरी ९ सय ४१ मतभार छ । राष्ट्रिय प्रजातन्त्र पार्टी (राप्रपा) को १ सय ६, राष्ट्रिय जनमोर्चाको ५७ र नेपाल समाजवादी पार्टीको ५३ मतभार छ । निर्वाचन आयोगले निर्वाचनलाई सफल बनाउन सरोकार पक्ष सबैलाई आग्रह गरेको छ । कार्यालय स्थापनाको बेलामा विभिन्न राजनीतिक पार्टीका प्रमुख तथा प्रतिनिधि पनि सहभागी भएका थिए ।