पोखरा  एसियाली विकास बैंक (एडीबी) को सहुलियतपूर्ण ऋणमा नेपालका प्रमुख राजमार्गहरू विस्तार गर्ने काम धमाधम भइरहे पनि कतिपय खण्डको प्रगति भने अझै सन्तोषजनक देखिएको छैन । केही स्थानमा निर्माण कार्य अन्तिम चरणमा पुगेका छन् भने कतिपयमा निर्माण व्यवसायीलाई बारम्बार ताकेता गर्दा पनि कामले गति लिन सकेको छैन ।

आयोजना निर्देशनालय (एडीबी) का अनुसार सन् २०२५ मा लक्ष्यको ११२ प्रतिशत पुँजीगत खर्च हुनुले निर्माणको गति बढेको संकेत त गर्छ, तर बिजुलीका पोल र खानेपानीका पाइप सार्ने समस्याले अझै अवरोध सिर्जना गरिरहेको छ ।

पोखरा -मुग्लिनमा एउटा खण्ड सम्पन्न, अर्कोमा प्रगति 
आँबुखैरेनी–पोखरा सडक (८०.३३ किमि) अन्तर्गत आँबुखैरेनी–जामुने खण्डको ४०.५२१ किलोमिटर सडक कालोपत्र गर्ने काम सकिएको छ । चाइना कम्युनिकेसन्स कन्स्ट्रक्सनले जिम्मा लिएको यो खण्डमा १७ वटा पुल र १६८ वटा कल्भर्ट बनेका छन् । यही सडकको दोस्रो खण्ड (जामुने–पोखरा) मा भने हालसम्म ६५.५९ प्रतिशत मात्र प्रगति छ । ३८.७१ किमिको यो खण्डमा ३१.३ किमि चार लेन र ६.२ किमि दुई लेन सडक कालोपत्र भइसकेको छ । ठेक्का तोड्ने चेतावनीपछि यहाँ यानहुई काइयुआन हाइवे कम्पनीले कामको रफ्तार बढाएको छ । यस खण्डको म्याद २०८३ असारसम्म थपिएको छ ।

त्यस्तै, यही क्षेत्रमा पर्ने सेती पुलको ५४ प्रतिशत र मादी पुलको ७३.६७ प्रतिशत र विजयपुर खोला पुलकाे प्रगित करिब ७५ प्रतिसत छ । काम नसकिएपछि १६ असार २०८३ सम्म म्याद थपिएको छ ।  मुग्लिन–आँबुखैरेनी खण्डको स्तरोन्नतिका लागि फागुन दोस्रो साताभित्र ठेक्का आह्वान गर्ने तयारी छ । यहाँ मर्स्याङ्दी जलविद्युत् आयोजनाको संरचनाका कारण वारि र पारि २–२ लेनको सडक बनाइनेछ ।

नारायणगढ–बुटवल: दाउन्नेमा सास्ती, समग्रमा ७३ प्रतिशत प्रगति
विस्तारको क्रममा रहेको नारायणगढ–बुटवल खण्डको समग्र भौतिक प्रगति ७३.६०२ प्रतिशत पुगेको छ । ११३ किमिमध्ये करिब ८२ किमि सडक चार लेनमा कालोपत्र भइसकेको छ । यद्यपि, दाउन्ने खण्डको १४ किलोमिटरमा भने यात्रा अझै कष्टकर छ । पछिल्लो समय शीतलहर र हुस्सुका कारण सवारी साधन चिप्लिने समस्या भएपछि मालवाहक सवारीलाई वैकल्पिक मार्ग प्रयोग गर्न सुझाइएको  छ।  

पूर्व–पश्चिम राजमार्ग: कमला–कञ्चनपुर र काँकडभिट्टा–लौकहीको अवस्था
कमला–कञ्चनपुर खण्डमा निर्माण अवधि पटक–पटक थपिए पनि हालसम्म ६६.७२५ प्रतिशत मात्र भौतिक प्रगति छ । १५ अर्ब ६६ करोडको लागतमा निर्माणाधीन ८६.८२ किमि दूरीको यो सडकको जिम्मा चाइना रेलवे नम्बर २ ले लिएको छ ।

यस्तै, एसियन हाइवेअन्तर्गत काँकडभिट्टादेखि सुनसरीको लबिपुरसम्म ९५.७६ किमि सडक विस्तारको समग्र प्रगति २८ प्रतिशत मात्रै छ । तीन प्याकेजमा बाँडेर काम भइरहेको यो खण्डमा ६ वटा लामा पुलसहित ६ लेन र ४ लेनका सडक बन्नेछन् । यस खण्डको काम २०८३ माघभित्र सक्नुपर्ने सम्झौता छ । आयोजनाका अनुसार जामुने–पोखरामा सुधार आए पनि काँकडभिट्टा–लौकही र कमला–कञ्चनपुर खण्डमा भने अपेक्षाअनुसार काम हुन सकेको छैन । निर्माण सामग्री र उपयोगिताका संरचना स्थानान्तरणमा ढिलाइ हुनुलाई मुख्य चुनौतीका रूपमा हेरिएको छ ।