पोखरा। युनाइटेड क्लब पोखराको आयोजनामा आगामी पुस २९ गतेदेखि १४ औँ संस्करणको ‘पोखरा महोत्सव’  हुने भएको छ । पोखराको अमरसिंह माध्यमिक विद्यालयको विशाल खेल मैदानमा आयोजना हुने यो महोत्सव माघ ११ गतेसम्म चल्नेछ ।

“युवाको जाँगर राष्ट्र निर्माणको आधार” भन्ने मूल नाराका साथ वि.सं. २०६७ मा स्थापना भएको युनाईटेड क्लबले स्थापनाकालदेखि नै शिक्षा, स्वास्थ्य, खेलकुद र पर्यटन प्रवद्र्धनका लागि महोत्सव आयोजना गर्दै आएको छ । यस वर्षको महोत्सवको मुख्य उद्देश्य पोखरा–२७ अर्चलेमा विपन्न परिवारका बालबालिकाका लागि निर्माणाधीन ‘युनाइटेड छात्रबास’लाई पूर्णता दिनु रहेको छ ।

क्लबले पोखरा २७ अर्चललेमा युनाईटेड छात्राबास निर्माण गर्न लागेको क्लबका पूर्वअध्यक्ष राजु श्रेष्ठले बताए । महोत्सवबाट हुने आम्दानीले भवन निर्माण गरिने उनको भनाइ छ । अमरसिंह माध्यमिक विद्यालय व्यवस्थापन समितिका अध्यक्ष कृष्ण कोइरालाले विद्यालयको गतिविधिमा असर नपुग्ने गरि कार्यक्रम आयोजना गरिएको जानकारी दिए । क्लबले विद्यालयलाई विभिन्न सहयोग गरेको बताउँदै विद्यालयको जग्गा संरक्षणमा पनि सहयोग गरेको कोइरालाले बताए ।

पत्रकार महासंघ कास्कीका अध्यक्ष माधव बरालले उद्देश्यकेन्द्रित कार्यक्रम आयोजना गर्न आग्रह गर्दै कार्यक्रमको उद्देश्य पुरा भए नभएकोप्रति आयोजकले आत्ममुल्यांकन गर्न आवश्यक रहेको बताए । उनका अनुसार कार्यक्रमले व्यवसायलाई साँच्चै चलायमान बनाएको छ कि छैन, स्थानीय कला, संस्कृति र पहिचानको संरक्षण तथा प्रवद्र्धनमा कति योगदान पुगेको छ भन्ने जस्ता पक्षमा आयोजकले गहिरो ध्यान दिन जरुरी छ ।क्लबले यस महोत्सवलाई सफल बनाउन सम्पूर्ण पोखरावासी, पर्यटन व्यवसायी र सञ्चारकर्मीहरूलाई अपिल गरेको छ । पत्रकार सम्मेलन क्लबका अध्यक्ष लोकबहादुर थापाको अध्यक्षतामा भएको थियाे ।

सामाजिक कार्यमा महोत्सवको लगानी
प्रचार–प्रसार उपसमितिका संयोजक दिनेश सुनारले महोत्सवको आम्दानीबाट हालसम्म पोखरा क्षेत्रका २० वटा सामुदायिक विद्यालयमा छात्रवृत्ति अक्षयकोष स्थापना गरिएको जानकारी दिनुभयो । क्लबले पर्यटन प्रवद्र्धनअन्तर्गत पचभैयामा खुला चिडियाखाना निर्माणको पहल र सेती नदीका खोँचहरूलाई साहसिक पर्यटकीय गन्तव्य बनाउने अभियानलाई पनि अगाडि बढाएको छ । यस वर्ष महोत्सवबाट बचत हुने रकमको ठूलो हिस्सा निर्माणाधीन २० कोठे छात्रबास भवनमा खर्च गरिनेछ । हालसम्म ३ वटा कोठा निर्माण सम्पन्न भइसकेको र आगामी शैक्षिक सत्रदेखि छात्रबास सञ्चालनमा ल्याउने लक्ष्य राखिएको क्लबले जनाएको छ ।

आकर्षण र स्टलहरू
१३ दिनसम्म चल्ने महोत्सवमा कुल २५० वटा स्टलहरू रहनेछन्, जुन सबै बुकिङ भइसकेका छन् । महोत्सवमा २ देखि २ लाख ५० हजार दर्शकले अवलोकन गर्ने अनुमान गरिएको छ । महोत्सवको कुल आम्दानी १ करोड ५१ लाख ७५ हजार र खर्च १ करोड २३ लाख ६० हजार रुपैयाँ हुने अनुमान गरिएको छ, जसबाट करिब २८ लाख १५ हजार रुपैयाँ बचत गर्ने लक्ष्य राखिएको छ ।

महोत्सवमा औद्योगिक उत्पादन, हस्तकला, सूचना प्रविधि, कृषि प्रदर्शनी र स्थानीय तथा अन्तर्राष्ट्रिय उपभोग्य वस्तुहरूको प्रदर्शनी तथा बिक्री गरिनेछ । साथै, विद्यालय स्तरीय लोकनृत्य प्रतियोगिता र विज्ञान प्रदर्शनी समेत आकर्षणका रूपमा रहनेछन् ।

कलाकारहरूको ओइरो
महोत्सवको सांस्कृतिकतर्फ प्रकाश सपुत, बद्री पंगेनी, शान्तिश्री परियार, प्रीति आले, सम्झना लामिछाने मगर, प्रमोद खरेल, अस्मिता अधिकारी लगायतका कलाकारहरूको प्रस्तुति रहनेछ । यस्तै, लाइभ कन्सर्टतर्फ सविन राई, भिटेन, लाहुरे, पूर्ण राई, डी मर्चा जस्ता ब्याण्ड र गायकहरूले दर्शकलाई मनोरञ्जन दिनेछन् ।

निःशुल्क प्रवेशको व्यवस्था
महोत्सवमा फरक क्षमता भएका व्यक्ति, वृद्धभत्ता कार्ड भएका ज्येष्ठ नागरिक, एकल महिला, विदेशी पर्यटक, पत्रकार र ५ वर्षमुनिका बालबालिकालाई निःशुल्क प्रवेशको व्यवस्था मिलाइएको छ । महोत्सवको मुख्य प्रायोजकमा रवि एण्ड सन्नी इण्डष्ट्रिज (बेटर होम एप्लायन्सेस) र सह–प्रयोजकमा सिटीजन फर्निचर रहेका छन् ।