पोखरा। पोखराको नयाँबजारमा मंसिर १७ गतेदेखि सुरु भएको ‘नेपाल मणिपाल अस्पताल ३४ औं राष्ट्रिय औद्योगिक व्यापार मेला तथा १३ औं क्यान इन्फोटेक २०८२,पोखरा’ सफलतापुर्वक सकिएको छ । पाँचदिने मेलाको पोखरा महानगरपालिकाका प्रमुख धनराज आचार्यले समापन गरेका हुन् ।

समापनको अवसरमा बोल्दै मेयर आचार्यले रोजगारी सिर्जना गर्नका लागि महानगरले सक्दो प्रयास गरेको बताए । व्यवसाय प्रवर्द्धन केन्द्रमार्फत् महानगरले उद्यमशीलता चाहनेहरूका लागि तालिम र परामर्श सेवा प्रदान गरिरहेको उनले बताए । रोजगारी सिर्जना र भौतिक विकासका निम्ति महानगर निजी क्षेत्रसँग हातेमालो गर्दै अगाडि बढ्ने उनको प्रतिवद्धता थियो ।

कार्यक्रममा बोल्दै पोखरा उद्योग वाणिज्य सङ्घ तथा कार्यक्रममा अध्यक्ष गोकर्ण कार्कीले उद्यमशील व्यक्तिलाई राज्यले संरक्षण र सहयोग गर्नुपर्ने बताए ।
‘राजनीति भनेको पेशा हैन र पेशा र व्यवसाय गर्ने मान्छे नै राजनीतिमा होमिने हो भन्ने हाम्रो मान्यता रहेको छ,’अध्यक्ष कार्कीले भने,‘पछिल्लो समय, बैङ्कसँग ऋण लिएर व्यापार –व्यवसाय गर्ने, रोजगारी सिर्जना गर्ने मान्छेलाई अपराधी करार गर्ने प्रवृत्ति बढेको छ । गएको भदौ २४ गतेलाई हामी बिर्सन चाहन्छौँ तर त्यो बेला ताकी–ताकी, छानी–छानी उद्योगी/व्यवसायीमाथि भएको आक्रमणलाई हामी क्रान्ति हो भन्ने पक्षमा छैनौँ । आइन्दा यस्ता घटना नदोरिउन् र व्यवसायीले सम्मानपूर्वक बस्ने वातावरण बनोस् भन्ने हाम्रो कामना रहेको छ ।’

पोखरा उद्योग वाणिज्य सङ्घका उद्योग उपाध्यक्ष दिनेशचन्द्र बास्तोलाको धन्यवाद तथा महासचिव शोभा गौतमको सञ्चालन रहेको कार्यक्रममा बोल्दै पोखरा महानगरपालिकाका आर्थिक महाशाखा प्रमुख मनोहर कडरियाले उत्पादकत्व नबढाएसम्म देशले समृद्धि प्राप्त गर्न नसक्ने बताए । मेलाको मुख्य प्रायोजक मणिपाल शिक्षण अस्पतालका कार्यकारी निर्देशक अनिल ओडोविलले गुणस्तरीय स्वास्थ्य सेवामार्फत पोखरालाई स्वास्थ्य पर्यटनको केन्द्र बनाउन मणिपाल अगाडि बढेको बताए ।

नेपाल पत्रकार महासङ्घ गण्डकीकी अध्यक्ष जमुना वर्षा शर्माले मेला र महोत्सवमार्फत स्थानीय उत्पादनको प्रवर्द्धन तथा अर्थतन्त्र चलायमान बनाउन पोखरा उद्योग वाणिज्य सङ्घले विशेष भूमिका खेलेको बताइन् ।
समापनको अवसरमा उत्कृष्ट स्टलतर्फ कस्मिक कम्प्युटर, उत्कृष्ट झाँकी र सांस्कृतिक कार्यक्रम प्रस्तुत गर्ने नेपाल मगर सङ्घ कास्की र देवीस्थान भजन समूह हेमजालाई सम्मान गरिएको थियो ।

पोखरा लगायत सम्पूर्ण राष्ट्रको औद्योगिक,कृषिजन्य, हस्तकलाका उत्पादन, सूचना प्रविधि, शिक्षा, स्वास्थ्य,पर्यटनलगायत कृषिजन्य उत्पादनहरुलाई प्रवर्द्धन तथा बजारीकरणमा समेत सघाउ पुर्‍याउने उद्देश्यले मेलाको आयोजना गरिएको हो ।

लगानीको सम्वर्द्धन ः उद्योग व्यवसायको प्रवर्द्धन भन्ने नारा अनुरुप मेला गण्डकी प्रदेशको व्यवसाय बिस्तारको संभावनाकोखोजी तथा पर्यटकीय सम्भावना उजागर गर्ने उद्देश्यमा समर्पित रहेको प्रचार–प्रसार संयोजक तथा पोखरा उद्योग वाणिज्य सङ्घका कार्यसमिति सदस्य मनोहरि पौडेलले जानकारी दिए । मेलाअन्तर्गत नै उद्यमशीलता प्रवद्र्धन,लगानी मैत्री नीति निर्माण,नवप्रवर्तन,सूचना प्रविधि,कृषिसँग सम्बन्धित विभिन्न परिसंवाद कार्यक्रम पनि सञ्चालन गरिएको उनले बताए ।