काठमाडौं। प्रधानमन्त्री केपी शर्मा ओली शनिबार चीन भ्रमणमा जानुहुने भएकाे छ । चिनियाँ राष्ट्रपति सी चिनफिङको निमन्त्रणामा उहाँ पाँचदिने औपचारिक भ्रमणमा जान लाग्नुभएको हो । यस क्रममा प्रधानमन्त्री ओलीले साङ्घाई सहयोग संगठन (एससिओ) को २०२५ को शिखर सम्मेलनमा सहभागिता जनाउने कार्यक्रम छ ।

परराष्ट्र मन्त्रालयका अनुसार प्रधानमन्त्री ओलीले तियानजिनमा राष्ट्रपति चिनफिङसँग द्विपक्षीय भेटवार्ता गर्नेछन् । उहाँले सेप्टेम्बर १ मा हुने शिखर सम्मेलनलाई सम्बोधन गर्नुका साथै विश्वका विभिन्न राष्ट्रप्रमुख र सरकार प्रमुखहरूसँग भेटघाट गर्ने तालिका तय भएको छ । त्यसपछिल्लो दिन बेइजिङमा उपराष्ट्रपति हान झेङसँग भेट हुने कार्यक्रमसमेत छ ।

भ्रमणको अन्तिम दिन प्रधानमन्त्री ओली बेइजिङमा आयोजना हुने जापानी आक्रमणविरुद्ध चीनले विजय हासिल गरेको ८० औं वार्षिकोत्सवमा सहभागी हुनेछन् । उहाँसँगै प्रधानमन्त्रीपत्नी राधिका शाक्य, शिक्षा, विज्ञान तथा प्रविधिमन्त्री रघुजी पन्त, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे, सांसद पूर्णबहादुर खड्का, सांसद छविलाल विश्वकर्मा, प्रधानमन्त्रीका सल्लाहकार डा. युवराज खतिवडा लगायत उच्च अधिकारीहरू भ्रमण टोलीमा रहेका छन् ।

गोरखापत्रका बेइजिङ संवाददाताका अनुसार चिनियाँ राष्ट्रपति सी चिनफिङले उद्घाटन गर्ने शिखर सम्मेलनमा एससिओका १० पूर्ण सदस्य राष्ट्रसहित २० मुलुकका राष्ट्रप्रमुख र सरकार प्रमुख, साथै १० अन्तर्राष्ट्रिय संस्थाका प्रमुख सहभागी हुनेछन् । भारतका प्रधानमन्त्री नरेन्द्र मोदी, रुसका राष्ट्रपति भ्लादिमिर पुटिन, इरानका राष्ट्रपति मसुद पेजेस्कियान, पाकिस्तानका प्रधानमन्त्री सहबाज सरिफ, टर्कीका राष्ट्रपति रेसिप तैयप एर्दोगान लगायतलाई निमन्त्रणा पठाइएको छ । संयुक्त राष्ट्रसङ्घका महासचिव एन्टेनियो गुटेरेस पनि सम्मेलनमा उपस्थित हुनहुनेछ ।

नेपाल सन् २०१६ मा एससिओमा संवाद साझेदारका रूपमा आबद्ध भएको हो । चीन, काजाकिस्तान, कीर्गिस्तान, रुस, ताजिकिस्तान र उज्बेकिस्तानबाट सन् २००१ मा स्थापित यो संगठन अहिले युरेसियन राजनीतिक, आर्थिक तथा सुरक्षा संरचना भएको छ । नेपालसहित कतार, श्रीलङ्का, टर्की, कम्बोडिया, माल्दिभ्स, संयुक्त अरब इमिरेट्स, साउदी अरब लगायतका देश संवाद साझेदारका रूपमा रहेका छन् भने अफगानिस्तान र मङ्गोलिया पर्यवेक्षक सदस्य हुन् ।

प्रधानमन्त्री ओलीले शिखर सम्मेलनपछि भदौ १८ गते बेइजिङको तियानमिन स्क्वायरमा हुने स्मृति समारोह र सैनिक परेडमा पनि विशेष सहभागिता जनाउनेछन् । सो अवसरमा रुसका राष्ट्रपति पुटिन, उत्तर कोरियाका नेता किम जोङ उन, कम्बोडियाका राजा सिहामोनीलगायत २६ मुलुकका राष्ट्रप्रमुख तथा सरकार प्रमुखहरू उपस्थित हुने जनाइएको छ ।