पोखरा । पछिल्लो वर्ष अन्नपूर्ण संरक्षण क्षेत्र आयोजना (एक्याप)मा पर्यटक आगमन उल्लेख्य बढेपछि प्रवेश शुल्क आम्दानी पनि उल्लेख्य रुपमा वृद्धि भएको छ ।

एक्यापका अनुसार आव २०८०/८१ मा दुई लाख ७८ हजार ११३ विदेशी पर्यटक उक्त क्षेत्रमा पुगेका थिए । अघिल्लो आवको तुलनामा करिब २५ प्रतिशत बढी पर्यटक भित्रिएपछि प्रवेश शुल्कबापत जम्मा ४६ करोड ४८ लाख ८१ हजार ४८३ रुपैयाँ संकलन भएको हो । अघिल्लो आवमा दुई लाख २२ हजार १८० पर्यटक आएका थिए र सो समयमा ३८ करोड ९४ लाख ६१ हजार ४८३ रुपैयाँ आम्दानी भएको थियो ।

गत आवमा आएका पर्यटकमध्ये एक लाख ५७ हजार ७८६ दक्षिण एसियाली मुलुकका र एक लाख २० हजार ३२७ अन्य देशका रहेका एक्यापले जनाएको छ । दक्षिण एसियाली नागरिकलाई प्रवेश शुल्क एक हजार रुपैयाँ र अन्य मुलुकका पर्यटकलाई तीन हजार रुपैयाँ तोकिएको आयोजनाका प्रमुख डा. रविन कडरियाले जानकारी दिए ।

उनका अनुसार सरकारबाट छुट्टै बजेट नआउने भएकाले कार्यालय सञ्चालनदेखि कार्यक्रम कार्यान्वयनसम्म सबै खर्च प्रवेश शुल्कलगायत आन्तरिक आम्दानीमै भर पर्छ । चालु आवका लागि ३८ करोड रुपैयाँ बराबरको बजेट स्वीकृत भएको उनले बताए ।

पर्यटक शुल्कबाट संकलित रकम संरक्षण, पदमार्ग निर्माण, फोहर व्यवस्थापन, खानेपानी तथा सिँचाइ योजना, आयआर्जन कार्यक्रम र संरक्षण शिक्षाजस्ता कार्यमा प्रयोग हुने गरेको छ । तर जडीबुटी संकलनजस्ता प्राकृतिक स्रोत उपयोगबापतको राजस्व भने सरकारले लिने व्यवस्था रहेको छ ।

यससँगै उपल्लो मुस्ताङ र मनाङको नार–फू जस्ता निषेधित क्षेत्रमा मात्र गत आवमा ३० करोड १७ लाख ५२ हजार रुपैयाँ संकलन भएको छ । ती क्षेत्रमा प्रवेश गर्ने विदेशी नागरिकले अध्यागमन कार्यालयमार्फत शुल्क बुझाउनुपर्ने व्यवस्था छ । उपल्लो मुस्ताङ घुम्न ५०० डलर र नार–फू जान १,००० डलर तिर्नुपर्ने प्रावधान छ ।

अन्नपूर्ण क्षेत्रमा चैत–वैशाख र असोज–कात्तिक मुख्य पदयात्रा सिजन मानिन्छ । सो समयमा मात्र होइन, धार्मिक गन्तव्यका लागि आउने पर्यटक पनि उल्लेख्य हुने गरेका छन् । वर्षा र जाडोमा भने पर्यटक संख्या घट्ने भए पनि मुक्तिनाथ र पदमार्गका विभिन्न गन्तव्यमा आन्तरिक तथा बाह्य दुवै खाले पर्यटकको चहलपहल हुने गरेको छ ।

७,६०० वर्गकिलोमिटरमा फैलिएको अन्नपूर्ण संरक्षण क्षेत्रमा कास्की, लमजुङ, मनाङ, म्याग्दी र मुस्ताङ जिल्लाका १५ स्थानीय तहअन्तर्गत ८७ वटा वडा पर्छन् । यहाँ अन्नपूर्ण आधार शिविर, मर्दी हिमाल, घान्द्रुक, तिलिचो ताल, थोरङ्ला भञ्ज्याङ, घोडेपानी–पुनहिल, उपल्लो मुस्ताङलगायतका गन्तव्यमा हरेक वर्ष लाखौँ आन्तरिक तथा विदेशी पर्यटक पुग्ने गरेका छन् ।