पोखरा । पोखरा अन्तर्राष्ट्रिय विमानस्थलबाट छेन्दु हुँदै अष्ट्रेलिया उडान सुरु गर्ने तयारी चीनको सिचुवान एयरलाइन्सले गरेको छ । यसका लागि कम्पनीले नेपाल नागरिक उड्डयन प्राधिकरणसँग अनुमति मागिसकेको छ ।

प्राधिकरणका सूचना अधिकारी ज्ञानेन्द्र भूलका अनुसार अनुमतिका विषयमा अनौपचारिक छलफल भएको छ र प्रक्रिया पूरा भएपछि अनुमति दिने तयारी भइरहेको छ । एयरलाइन्सले सेप्टेम्बरदेखि उडान सुरु गर्ने योजना बनाएको उनले जानकारी दिए ।

यसअघि सिचुवान एयरलाइन्सले पोखरामा चार्टर्ड उडान गरिसकेको थियो । सन् २०२३ मा ‘नेपाल–चाइना फ्रेन्डसिप ड्रागन बोट रेस फेस्टिभल’का लागि कम्पनीले पहिलोपटक पोखरामा विमान उतारेको थियो । अब भने अष्ट्रेलियालाई नियमित गन्तव्य बनाउन एयरलाइन्स इच्छुक छ ।

यस्तै, भुटान एयरलाइन्स (टासी)ले पनि सेप्टेम्बर २८ र अक्टोबरमा पोखराबाट पारोका लागि चार्टर्ड उडान अनुमति मागेको प्राधिकरणले जनाएको छ । सुरुमा काठमाडौं–पारो उडान गरेर, पछि पारो–पोखरा–दिल्ली जोड्ने योजना रहेको एयरलाइन्सले जनाएको छ ।

हाल पोखरामा हिमालय एयरलाइन्स मात्र नियमित उडान गर्दै आएको छ । आगामी महिनादेखि सिचुवान र भुटान एयरलाइन्ससमेत सञ्चालनमा आएपछि विमानस्थल चहलपहल हुने प्राधिकरणको अपेक्षा छ ।

२०७९ पुस १७ मा उद्घाटन भएको पोखरा अन्तर्राष्ट्रिय विमानस्थल २२ अर्ब लागतमा बनेको हो । २,५०० मिटर लम्बाइ र ४५ मिटर चौडाइको धावनमार्गसहित यस विमानस्थलमा वार्षिक आठ लाख यात्रु समेट्ने क्षमता रहेको छ ।