पोखरा । नेपाल कम्युनिष्ट पार्टी (एमाले) पोखरा महानगरपालिका वडा कमिटी–५ ले आफ्नो नवनिर्मित कार्यालय भवनको उद्घाटनसहित हरितालिका तीज विशेष कार्यक्रम सम्पन्न गरेको छ ।

नयाँ भवनको उद्घाटन एमाले केन्द्रीय सदस्य तथा गण्डकी प्रदेशसभाका पूर्व सदस्य राजिव पहारीले गर्नुभयो । पहारीले करिब १५ वर्षका लागि भाडामा लिइएको मालेपाटनस्थित जग्गामा बनेको भवनले पार्टी गतिविधि व्यवस्थित र चुस्त बनाउने विश्वास व्यक्त गर्नुभयो । उहाँले वडा नं. ५ राजनीतिक, सामाजिक र संगठनात्मक हिसाबले अग्रणी रहेको भन्दै वडा कमिटीको नागरिकमैत्री भूमिकाको प्रशंसा पनि गर्नुभयो ।

कार्यक्रममा अनेमसङ्घ वडा कमिटी–५ का अध्यक्ष बिन्दु पौडेलले तीजलाई खुलापन र महिला सशक्तीकरणसँग जोड्नुपर्नेमा जोड दिँदै मौलिक संस्कृतिको जगेर्ना गर्न आग्रह गर्नुभयो । सो अवसरमा गण्डकी प्रदेशसभा सदस्य देवका पहारी, प्रदेश कमिटी सदस्य उमा कोइराला, जिल्ला अध्यक्ष बैनबहादुर अधिकारी क्षेत्री, महानगर कमिटी अध्यक्ष जीवनप्रसाद आचार्य, वडा अध्यक्ष बिष्णुप्रसाद बराल, पूर्व वडा अध्यक्ष धनबहादुर नेपाली, जिल्ला उपाध्यक्ष भेषराज बराल लगायतका नेताहरूले शुभकामना मन्तव्य राखेका थिए ।

वडा कमिटी अध्यक्ष लक्ष्मण बरालका अनुसार भवन निर्माणमा विभिन्न तहका नेता–कार्यकर्ता, शुभेच्छुक र स्थानीयको सहयोगमा करिब १७ लाख रुपैयाँ खर्च भएको हो । उहाँले यो कार्यालय कार्यकर्ताहरूको आस्था र सम्मानको प्रतीक हुने विश्वास व्यक्त गर्दै प्रविधिमैत्री कार्यशैली, सामाजिक सञ्जालमार्फत प्रचार–प्रसार र संगठन सुदृढीकरणमा यस भवनलाई प्रयोग गरिने प्रतिबद्धता जनाउनुभयो । साथै, सबै सहयोगी हातहरूलाई धन्यवाद व्यक्त गर्दै बरालले तीज पर्वले लैंगिक तथा जातीय भेदभावको अन्त्य गर्दै समतामूलक समाज निर्माणमा योगदान पुगोस् भन्ने शुभकामना दिनुभयो ।

वडा कमिटी सदस्य प्रदीप सुवेदीका अनुसार करिब दुई आना क्षेत्रफलमा बनेको भवन दुई तले छ र आईरन ढलान प्रयोग गरिएको छ । कार्यक्रममा पोखरा स्वास्थ्य विज्ञान प्रतिष्ठानका उपकुलपति प्रा.डा. भरतबहादुर खत्री र भवन निर्माणमा विशेष योगदान पुर्‍याउने जीवन लामालाई सम्मान गरिएको थियो । समारोह कमिटी अध्यक्ष लक्ष्मण बरालको अध्यक्षतामा सम्पन्न भएको हो । कार्यक्रममा स्वागत मन्तव्य उपाध्यक्ष पानप्रसाद तिमिल्सिनाले दिनु भएको थियो भने सञ्चालन सचिव वसन्तराज गौतमले गर्नुभएको थियो ।