पोखरा । नेपाल नागरिक उड्डयन प्राधिकरण (क्यान) का महानिर्देशक प्रदीप अधिकारीले पोखरा क्षेत्रीय अन्तर्राष्ट्रिय विमानस्थल निर्माणमा प्राधिकरणले एक रुपैयाँ पनि खर्च नगरेको दाबी गरेका छन्। पोखरामा आयाेजित पत्रकार सम्मेलनमा उनले २०७१ देखि २०७९ सम्म क्यानको खाताबाट विमानस्थल परिसरमा खर्चिएको कुनै रकम नभएको स्पष्ट पारे।
संसदीय उपसमितिले विमानस्थल निर्माणमा १० अर्बभन्दा बढी अनियमितता भएको निष्कर्षसहित प्रतिवेदन दिएपछि अधिकारीले ती आरोपलाई “हावादारी, हास्यास्पद र आधारहीन” भन्दै कडा खण्डन गरे। उनका अनुसार प्रतिवेदनले आफूलाई प्रश्न गर्ने वा स्पष्टीकरण दिने अवसर नै नदिई एकपक्षीय रूपमा तयार गरिएको हो।
समितिले विमानस्थलको लागत करिब १५ अर्बबाट २२ अर्ब पुगेको र करिब २ अर्ब २२ करोड रुपैयाँ कर छुट दिएर अनियमितता भएको आरोप लगाएको थियो। तर अधिकारीले मूल्यवृद्धि, महँगीको समायोजन र आवश्यक पूर्वाधार थप्नुपरेका कारण लागत बढेको बताए। उनका अनुसार बोर्डिङ ब्रिज र ३४ से.मी. कंक्रिट रनवे पोखराको भौगोलिक अवस्था र वर्षा विचार गरेर थपिएका संरचना हुन्।
रनवे धस्सिएको वा होचो भएको भनाइलाई अधिकारीले हास्यास्पद बताए। “बरु सतहभन्दा माथि उठाइएको छ, यो कुरा स्थानीयले पनि प्रमाणित गर्छन्,” उनले भने। आयल निगमको इन्धन डिपो निर्माणलाई समेत भ्रष्टाचारको रूपमा चित्रित गर्नु अज्ञानता मात्र भएको उनको टिप्पणी छ। उनले विमानस्थल निर्माणमा भ्रष्टाचार नभएको दाबी गर्दै यदि शंका छ भने स्वतन्त्र इन्जिनियरको टोली बनाएर २२ अर्ब बराबरको काम भएको वा नभएको मूल्यांकन गर्न चुनौती दिए।
ऋण र सञ्चालनबारे उनले थपे, “विमानस्थलको ऋण यात्रु सेवाशुल्कबाट तिर्ने व्यवस्था गरिएको छ, जनताले तिरेको कर प्रयोग गरिएको छैन।” चीनको एक्जिम बैंकसँग लिएको ऋणमध्ये दुई किस्ता तिरिसकेको र बाँकीमा समस्या नआउने उनको दाबी छ।
हाल आन्तरिक हवाई यात्रुको संख्या वार्षिक ४ लाखबाट बढेर ११ लाख पुगेको तथ्यांक प्रस्तुत गर्दै उनले विमानस्थललाई ‘सेतो हात्ती’ भन्ने धारणा अस्वीकृत गरे। चीनमा भ्रष्टाचारको सजाय मृत्युदण्डसम्म हुने उल्लेख गर्दै उनले चिनियाँ कम्पनीमार्फत अनियमितता भएको आरोपलाई पनि आधारहीन बताए। अधिकारीले पोखरा र पोखरेली जनतालाई बदनाम गर्ने उद्देश्यले प्रतिवेदन तयार गरिएको टिप्पणी गरे।
