पोखरा । पोखरा महानगरपालिका वडा नम्बर ४ को आयोजनामा वडा स्तरीय तीज गीत प्रतियोगिता सम्पन्न भएको छ । बुधबार सम्पन्न प्रतियगितामा गणेशटोल मिसा पुच प्रथम भएको छ । प्रथम हुन सफल उक्त समूहले २२ हजार रुपैयाँसहित प्रमाण पत्र प्राप्त गरेको छ । महिला समाजसेवा समिति दोस्रो हुँदै १७ हजार रुपैयाँ र प्रमाण पत्र प्राप्त गर्यो । जनहित महिला समूह तेस्रो हुँदै १२ हजार रुपैयाँ र प्रमाण पत्र प्राप्त गर्यो । सर्वेश्वर नारी समूहले सान्त्वना हुँदै सात हजार रुपैयाँ र प्रमाण पत्र प्राप्त गरेको छ ।

रामकृष्ण टोल मिसा पुच उत्कृष्ठ भेषभूषा, सिद्धार्थ टोल विकास संस्थाले समय व्यवस्थापन र फेवा शिक्षा सदनले उत्कृष्ठ नृत्यको पुरस्कार प्राप्त गरे । उत्कृष्ठ भेषभूषा, उत्कृष्ठ समय व्यवस्थापन र उत्कृष्ठ नृत्य देखाउने समूहले ३÷३ हजार रुपैयाँ पुरस्कारको साथमा प्रमाण पत्र प्राप्त गरेका हुन् । नेपाल आदर्श महिला समूह सहभागीता, गणेश योग केन्द्र, नमुना महिला समूह, शुभकामना महिला विकास केन्द्र । सिर्जनसिल महिला समूह प्रत्येकले दुई हजार ५०० का दरले नगदसहित प्रमाणपत्र प्राप्त गरे । उनीहरु सबैलाई वडाध्यक्ष देवकृष्ण पराजुलीसहित वडाका जनप्रतिनिधिले नगदसहित प्रमाण पत्र प्रदान गरेका हुन् ।

यस अगाडि प्रतियोगिताको पोखरा महानगरका उपप्रमुख मञ्जुदेवि गुरुङले उद्घाटन गरेकी हुन् । प्रतियोगिताको उद्घाटन गर्दै उनले वडा नम्बर ४ ले मौलिक संस्कृतिको संरक्षणका लागि प्रतियोगिता आयोजना गरेको बताईन् । तीजको सांस्कृतिक र ऐतिहासिक महत्व रहेपनि यसलाई महिलाले आफ्नो अपेक्षा पूरा गर्न गरेको बिद्रोहको स्मरण समेत रहेको बताइन् । तीज सबै समुदायको साझा चाडको रूपमा विकास भएको उनले उल्लेख गरिन् । यो कुनै एक धर्म, जाति र भाषाको नभइ सबैको साझा चाड बनेको उनको टिप्पणी थियो । उपप्रमुख गुरुङले विगतमा महिलालाई साँघुरो घेरामा राखिएको बेला मनका बह पोख्ने माध्यम भएपनि यो अधिकारको मागसंग समेत उपोगी बनेको धारणा राखिन् ।

पोखरा महानगरपालिका वडा नम्बर ४ का अध्यक्ष देवकृष्ण पराजुलीले तीज सबै जातजाति र भाषाभाषीको साझा चाडको रूपमा तीजको विकास गर्न सफल भएको बताए । उनले मंसिर १३ गते यमरी महोत्सव आयोजना गरिने जानकारी दिँदै महिला दिदिबहिनीको सक्रियताले वडामा संस्कृति संरक्षणसहित विकास निर्माण, सिप विकास र अन्य विविध कार्यहरु अगाडि बढेको स्मरण गरे । समग्र वडाको विकासका साथै यहाँको कला संस्कृतिको संरक्षणमा वडा लागि परेको उनले बताए । प्रतियोगिताले मौलिक संस्कृतिको जगर्ने गर्ने र क्षमता पहिचान गर्ने उनले अपेक्षा गरे । प्रतियोगिता उद्घाटन समारोहमा पोखरा महानरपालिकामा कांग्रेस दलका नेता एवं वडा नम्मबर २ का वडाध्यक्ष दिवसमान प्रधानांगले महिला सशक्तिकरणका लागि पोखरा महानगरले विभिन्नढंगले काम भइरहेको बताए ।

वडा नम्बर ८ का वडाध्यक्ष रूद्रनाथ बराल प्रतियोगिताले महिला सशत्तिकरण र मौलिक संस्कृतिको जगेर्नामा महत्वपूर्ण भूमिका खेलेको बताए । बरिष्ठ लोकगायिका हरिदेवी कोइरालले आफ्नै घर परिवार र वडाबाट सम्मानित हुन पाउँदा खुशी लागेको बताइन् । तीजमा यसको मूल्यमान्यता स्थापित गर्न प्रतियोगिता सफल रहेको उनको भनाई थियो ।

उक्त अवसरमा नेपाली कांग्रेस वडा नम्बर ४ वडा इकाई सचिव मनोज कोइराला, नवीन माध्यमिक विद्यालय व्यवस्थापन समिति अध्यक्ष सिरोजविजय कोइराला र सदस्य प्रकाश कोइराला लगायतले बोलेका थिए । प्रतियोगिताको उद्घाटनको अवसरमा मौलिक संस्कृति जोगाउन महत्पपूर्ण योगदान दिएको र वडाको गौरवको रुपमा रहेको भन्दै वरिष्ठ लोक गायिका हरिदेवी कोइरालालाई सम्मान गरिएको थियो ।

यसगरी पूर्व प्रदेशसभा सदस्य प्रभा कोइराला, सकुन्तला कोइराला, सरिता पराजुली, जानकी कोइराला र गोमा कोइरालाका साथै ९६ वर्षीया बृद्धा उमादेवी गुठाजुलाई सम्मान गरिएको थियो । उत्कृष्ठ कर्मचारीको रुपमा वडा सचिव कमला गुरूङ र सविता विश्वकर्मालाई नगदसहित सम्मान गरिएको थियो । पोखरा ४ गणेश गुठी परिसरमा भएको प्रतियोगितामा निर्णायकको रुपमा लोकदोहोरी गायक घनश्याम रिजाल, केशव घिमिरे र तुलसा जिसी थिए ।