पोखरा । नेकपा एमाले निकटको नेपाल उद्योग तथा व्यवसायी महासंघ गण्डकी प्रदेश कमिटीको तेस्रो वार्षिक साधारण सभा भएको छ । सभाले अध्यक्ष बोबरजंग गुरुङको प्रतिवेदन, सचिव यमनाथ पौडेलले पेश गरेको प्रगति प्रतिवेदन र कोषाध्यक्ष पार्वती पाण्डेले प्रस्तुत गरेको आर्थिक प्रतिवेदन सुधारसहित पारित गरेको छ । कार्यक्रममा नेकपा (एमाले)का स्थायी कमिटी सदस्य किरण गुरुङले राजनीतिक स्थायित्व विना अर्थतन्त्रको सुदृढ नहुने बताए । उनले समृद्ध नेपाल निर्माणका लागि राजनीतिक स्थायित्व आवश्यक पर्ने उल्लेख गरे ।

‘सरकारको स्थायित्व र राजनीतिक स्थिरता विना अर्थतन्त्रमा सुधार गर्न सकिन्न,’ उनले भने, ‘एमाले र नेपाली कांग्रेस मिलेर स्थीर सरकार दिने प्रयास भएको छ ।’ उनले सरकारले निजी क्षेत्रको प्रबद्र्धनका लागि नीतिगत प्रयास गरेको जानकारी दिए । उनले सरकारले अध्यादेशमार्फत निजी क्षेत्रको सवाललाई सम्बोधन गरेको बताए । आर्थिक नीति, मौद्रीक नीति दिगो र बलियो बन्नुपर्ने उल्लेख गर्दै उनले सरकार फेरिए पनि नीति फेरिन नहुने तर्क गरे । उद्योग व्यवसायको प्रवद्र्धनमा ध्यान दिने उल्लेख गर्दै उनले उद्योग व्यवसाय मैत्री नीति कार्यक्रम, बजेट तर्जुमामा ध्यान दिने बताए । उनले पार्टी निजी क्षेत्रको अभिभावक बन्ने विश्वास व्यक्त गरे ।

नेपाल उद्योग तथा व्यवसायी महासंघका केन्द्रीय अध्यक्ष भागीरथ सापकोटाले पार्टीको नीति र निर्दे शनलाई पालना गर्न तयार रहेपनि संगठन निर्माण र परिचालनमा हस्तक्षेप नगरी स्वतन्त्रता दिन आग्रह गरे । संगठन निर्माणमा पार्टीको सहयोग आवश्यक पर्ने उल्लेख गर्दै उनले नेतृत्व चयनका लागि संगठनलाई स्वायत्तता दिन माग गरे । राज्यका निकायमा निजी क्षेत्रको प्रतिनिधित्व आवश्यक पर्ने चर्चा गर्दै उनले नीति निर्माण गर्ने थलोमा निजी क्षेत्रको प्रतिनिधित्व भए आर्थिक क्रान्ति सम्भव भएको दाबी गरे । उनले महासंघले १ गाउँ १० उद्यमी निर्माणको अभियान थालेको जानकारी दिए ।

कार्यक्रममा नेपाल उद्योग तथा व्यवसायी महासंघ गण्डकीको सचिवालयको कार्य सम्पादनमा सहयोग गरेवापत निशान खनाललाई दोशल्ला ओढाएर सम्मान गरिएको छ । समारोहमा गण्डकी प्रदेश सभाका सदस्य गणेशमान गुरुङ, एमाले गण्डकी प्रदेश कमिटीका सचिव धनञ्जय दवाडी, नेपाल उद्योग तथा व्यवसायी संगठनका केन्द्रीय उपमहासचिव दिमप्रसाद पौडेल, केन्द्रीय सदस्य तथा गण्डकी प्रदेशका इञ्चार्ज संजीवबहादुर कोइराला, गण्डकीका उपाध्यक्ष ईश्वरबहादुर विष्ट, तनहुँका अध्यक्ष ऋषिराम पोखरेल, पोखरा चेम्बर अफ कमर्स कास्कीका अध्यक्ष उमराज बास्तोला, एमाले गण्डकी प्रदेश कमिटीका सदस्य तारामाया थापा, नेपाल ट्रेड युनियन महासंघ (जिफन्ट) गण्डकीका अध्यक्ष रुद्र खत्री लगायतले निजी क्षेत्रको समस्याको बारेमा बोलेका थिए ।