लेखनाथ । कास्कीको लेखनाथमा जारी २० औं लेखनाथ महोत्सवमा एकै स्थानमा सय भन्दा वढी प्रजातिका माछाको अवलोकन गर्न सकिनेछ । महोत्सवमा पहिलो पटक राखिएको अक्वारियममा विभिन्न जातका रङ्गी विरङ्गी माछाले दर्शकहरूको ध्यान तान्ने गरेको छ । अक्वारियम भित्र समुद्र मुनीको यात्राको महसुस गर्दै दर्शक र विद्यार्थीहरू फोटो खिचाउन भिड लाग्ने गरेको छ ।

अक्वारियमले महोत्सवमा थप आकर्षण दिएको र माछा सम्बन्धी थप अनुसन्धानका लागि पनि उपयुक्त भएको छ । माछालाई उपयुक्त वातावरण र पानीको गुणस्तर मापन गरी व्यवस्थापन गर्न ठूलो लगानी र वातावरणलाई ख्याल राख्नु पर्ने हुँदा थप व्यवस्थापन गर्न आवश्यक रहेको छ । विषेश गरी बालबालिकाको लागि थप आकर्षक बनेको लेखनाथ उद्योग वाणिज्य सङ्घका कोषाध्यक्ष एवं अर्थ तथा वित्त व्यवस्थापन समितिका संयोजक ध्रुवबाबु भट्टराईले जानकारी दिए ।

यसैबीच महोत्सवको छैटौँ दिन मङ्गलबार करिव १० हजार दर्शकले मेलाको अवलोकन गरेका छन् भने ३० लाख बराबरको आर्थिक कारोबार भएको महोत्सवका प्रचार प्रसार उप समितिका संयोजक जानुका अधिकारीले जानकारी दिइन । हालसम्म महोत्सवको ९६ हजार दर्शकहरूले अवलोकन गरेका छन भने ३ करोडको कारोबार गर्न सफल भएको छ ।
महोत्सवमा बुधबार लोकदोहोरीतर्फ बद्री पँगेनी, टिका सानु, प्रेमराज अधिकारी, रिया खड्का, रतिमाया खड्का, सन्तोष सुवेदी र बेलुका कन्सर्टमा रमेशराज भट्टराई र सिर्जना खत्री हाउडे मायाको प्रस्तुती रहने कलाकार व्यवस्थापन समितिका संयोजक उपेन्द्रराज सुवेदी ‘राजु’ ले जानकारी दिए ।

महोत्सवको पनि महोत्सवका रुपमा चिनिएको लेखनाथ महोत्सवमा साहित्य, महिला विशेष, विद्यालयस्तरीय, सांस्कृतिक, आदिवासी, जनजाति विशेष कार्यक्रम, जैविक विविधता, कृषि तथा पशुपक्षी प्रर्दशनी, सूचना प्रविधि, शैक्षिक प्रर्दशनी, हस्तकला, जातजतिहरूको सम्मानमा लोप हुन लागेका रीतिरिवाज तथा संस्कृति झल्काउने उत्कृष्ट नृत्य प्रर्दशनी रहने छन । महोत्सवमा ख्याति प्राप्त हास्य व्यङ्ग्य कलाकारहरूको दैनिक प्रस्तुति, बाल उद्यान, खाना महोत्सव, राष्ट्रिय लोक दोहोरी गीत, लाइभ म्युजिक कन्सर्ट थप आकर्षणका रुपमा राखिएको छ ।