तनहुँ । तनहुँमा माइक्रो बसले ठक्कर दिँदा प्रहरी हबल्दारको मृत्यु भएको छ । पृथ्वीराजमार्ग अन्तर्गत तनहुँको आँबुखैरेनी गाउँपालिका–२ ढापटारमा सोमबार बिहान माइक्रोले ठक्कर दिँदा गोरखा नगरपालिका– १४, गोप्लिंङ घर भई  ट्राफिक प्रहरी कार्यालय तनहुँमा कार्यरत भक्तबहादुर नहर्कीको मृत्यु भएको इलाका प्रहरी कार्यालय आँबुखैरेनीले जानकारी दिएको छ ।

गोरखाबाट पोखरातर्फ आउँदै गरेका हवल्दार नहर्की सवार गण्डकी एएए 00१५ नम्बरको मोटरसाइकललाई विपरीत दिशाबाट आउँदै गरेको ग १ ज ८४१८ नम्बरकाे विद्युतीय माइक्रोले ठक्कर दिइ गम्भीर घाइते बनाएको थियो । घाइते नहर्कीको आँबुखैरेनी अस्पतालमा उपचारको क्रममा मृत्यु भएको प्रहरीले जनाएको छ । माइक्रो र चालकलाई प्रहरीले नियन्त्रणमा लिएको छ ।