पोखरा । लगातारको वर्षा र बाढीका कराण १ जनाको मृत्यु भएको छ भने देशभर ६ जना बेपत्ता भएका छन् । नेपाल प्रहरीका अनुसार इलाममा एक जनाको मृत्यु भएको हो भने झापामा ३, काठमाडौं, बैतडी र मोरङमा एक÷एक जना बेपत्ता भएका छन् ।

झापामा ४ सयभन्दा बढी र मोरङमा एक सयभन्दा बढी व्यक्तिहरुलाई जोखिम क्षेत्रबाट सुरक्षित स्थानमा सारिएको छ । इलाममा बाढीले बगाएर एक जनाको मृत्यु भएको छ । वर्षाले ठाउँठाउँमा बाढी, पहिरो र डुबानको समस्या निम्तिएको छ । विभिन्न जिल्लामा सडक र पुलमा क्षति पुगेको छ । राजमार्गहरु पनि वर्षाकारण पहिरो खसेर अवरुद्ध भएका छन् ।

बाढी, पहिरो तथा डुबानको जोखिम शनिबारसम्मै कायम रहेकाले शुक्रबार र शनिबार दुई दिनसम्म रात्रि सेवाका सवारी साधन चलाउन रोक लगाइएको छ । पोखराको सेती नदीसहित विभिन्न नदी तथा खोलामा पानीको वहाव बढेको छ ।